ADVERTISEMENT

This area is available for advertisement. Please contact for details.

Arnivang
Get Adobe Flash player

PM barim A.B Vajpayee arong kachevoi aphuthak Karbi Anglong BJP aningduk

Alanglison asongja ke ave lo, ilitum aphan kanahok thepik lo: CEM

imageDiphu, Paipai 17: Atumi Paipai 16 arnikangsam porphai 5:05 apor phong thom an India prime minister keman abangphu Atal Bihari Vajpayee arong kachevoi jui aphuthak det adang aningkiduk along Karbi Anglong BJP atumta pini ningduk chipi dun.
Pini adap apor BJP East Karbi Anglong asaihem along BJP asongja atum pen chenglok KAAC CEM, EM, MAC atum chingrumsi PM barim Kt. Atal Bihari Vajpayee amohor along kanemprujin ameh kethek asai dengsi ningduk chipi dun lo.
La-an chot kali atumi arnikangsam pen ni troksi apharman song alama ta ebeng an pasun lo. Alangli inut kangtang kring asongja, alangli ongdung kemesen scheme kedeng tekang ajoine rat aphan ongdung ale dolo. Shine India pu scheme dengsi North East India angkang four line atovarpi nang pale lo. La-an chot kali alangli kacharli ahin kapaprang dun thekji aphan puta penang saideng (scheme) deng tekang lo. Lasi non ove kimi atum alangli keja atovar along kengkam kachejor nangji kenangsot, nelitum anta alangli kejalin atovar along kengkam kachejor dunji aphansi bor-i bom lo puta BJP EKADC ameiphu KAAC EM Roton Teron ningje.
PM barim Atal Bihari Vajpayee ason asongja ilitum along pen nang kachekak dun dak ke ilitum aphan kanahok thepik khangjang lo pusi KAAC CEM Tuliram Ronghang ningje.
Alangli North East angkang fourline atovarpi kevang pen chenglok Assam along kiding nai adolong Bhupen Hazarika amen pen kaselam Sadia adolong along-eh ta alanglisi som tekang lo. La-an chot kali India pen Pakistan Monsam kapadoji aphan puta alangli bus ingpusi amethang amat Pakistan an bus pale lo. La-an chot kali, Kargil aron, India Parliament along kangteng kheng heihui seta alangli kachari bom ahut dolo seta alangli kado kave ta kesaiphun un asongja pusi CEM Tuliram Ronghang ningje. Lasi alangli long kejalin akrong along non songja atum kacharli mate alangli keja tekang akrong along kengkam kachejor dun kenangsot puta Karbi Anglong Autonomous Council a CEM Tuliram Ronghang ningje.
Ningduk kachipi angthek pini arnikangsam apor melur kai dun lo, la-an chot kali state holiday kapangdak ateng ratpangri asaikam do-an, school, college heihui ta inghap lo lapen pini nerlosini Diphu ahithi ta panghap kling lo.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives