ADVERTISEMENT

This area is available for advertisement. Please contact for details.

Arnivang
Get Adobe Flash player

AKAISAWF Championship pini pen kecheng

imageDiphu, Paipai 17: KASA kapinkhat ateng Hanjanglangso Sports Association (HSA) atum patirpisi Hanjanglangso pathu aklam along 19 angdeng All Karbi Anglong Inter Sub Association Women Football Championship 2018 pini pen pangcheng lo.
HSA ameiphu EM barim JC Pathak pen kachepahemphu kapathu kecheng amai along tirikam chunbang Ramsing Tokbi pensi alohi kapachini apor en. Mai along alohi sarpo aman pen KAAC chairman Longki Timung chetong dun. KASA sankur chunbang Pankaj Teron, EM barim Rajendra Rongpi, Mouzader  barim Borsing Terang, KASA rap chunbang Sanjay Kro, Horen Ingti, Jecqulin Teronpi, Merina Terangpi lapen ongdung man kedo atum chetong dun.
Mai kepha alam KASA sankur chunbang Pankaj Teron pensi jai. Laso ahut alangli kejai ke, pining pen laso women football championship lake Karlitang Ex. EM Bhubon Ch. Terang chikimo amen pensi kapathu pusi pangdak. Pini laso kapathu along KAAC CEM Tuliram Ronghang si kangpuji alam do seta atumi India PM barim Atal Bihari Vajpayee men men kachevoijui ajok alangli kaprek kaprek asai kedokok ajoksi nang chetong dun un-eh detlo puta than.
Adunthu KAAC chairman Longki Timung pen KASA alama lapen JC Pathak pen HSA alama pachipur lo. KASA dun maiphu Pankaj Teron pen jalinsi karlitang atum aphan chikimo, laso along minute isi apor PM barim Kt. A.B Vajpayee aphanta chikimo lo.
Laso aphi jong pini kapathu aterank lapen alohi angbong chipachini lo kapathu ta KAAC chairman Longki Timnung pen ingpu lo. Pini kechengsi Hanjanglangso Sports Association lapen Dillai Sport Association atum angbongsi pathu lo.
Kapathu kecheng pen nat nat kapathu aterank atumta chiting kruplo seta Hanjanglangso SA atum goal 1 thapsi Dillai SA atum aphan parem detlo.
Pini kapathu kethek nai anong-eh lake Hanjanglangso SA pen Jarsey No. 7 Junaki Malar abangphisi chepalong lo. Laso a nong-eh lake Ex. EM J.C Pathak atum hem isi amen pen alangli methangsi pajir lo.
Penap porphai 2 apor pen Balipathar SA pen Taradubi SA angbongsi pathu po. Adunthu kapathuji lake Dokmoka SA pen Manja SA angbongsi pathuji. Pini kechengsi arni kapathu ingsamjin pensi chun lo.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives