ADVERTISEMENT

This area is available for advertisement. Please contact for details.

Arnivang
Get Adobe Flash player

PM barim Atal Bihari Vajpayee ave tanglo

imageNew Delhi, Paipai 16: Thelang arni pen keso kachelangdam prime minister barim Atal Bihari Vajpayee pini arnikangsam 5:05 apor arong chevoi jui lo. Alangli arong kachevoi ahut an arta ningkan 93 kepleng.
All India Institute of Medical Sciences (AIIMS) along seh chelang bom ahutsi asangtet jutkok lo.
Pini anerlo apor Vice-President M Venkaiah Naidu, Home Minister Rajnath Singh, BJP ameiphu Amit Shah, BJP jabang kehoi LK Advani, Congress ameiphu Rahul Gandhi atum ta AIIMS along Vajpayee aphan lang dam.
Thelang arni prime minister Narendra Modi ta AIIMS along Vajpayee aphan langdam lapen minute 50 apor an dodun lang. Railway Minister Piyush Goyal, BJP MP Meenakshi Lekhi, Union ministers Union Textiles Minister Smriti Irani, Suresh Prabhu, Jitendra Singh, Harsh Vardhan lapen Shahnawaz Hussain atum ta hospital along chetong dun.
Prime minister barim Vajpayee kidney tract infection, chest congestion akeso ajok AIIMS along Vosik 11 arni seh chelang dam lo lapen rui serkep angbong ke keme angthek dolo seta kedamtang Thelang arni pen keso nangchipur thusi seh langbom ahut pini arnikangsam apor chethe ave det lo.
Gwalior along 1924 aningkan Matijong 25 arnisi Atal Bihari Vajpayee amahang kethek. Apei amen Krishna Devi lapen apo amen Krishna Bihari Vajpayee. Alang phong thom prime minister arpu deng lo. Kechengsi ke 1996 aningkan ni kretrok apharman (1996 aningkan Aru 16 pen 31), adun ke 1998 pen 1999 an chiklo jon kre-isi apharman lapen phong thom abangke 1998 pen 2004 aningkan an. Indian National Congress pen kaprek a party angbong ningkan pho kangthimlim prime minister kekhi longcheng ke alang helo. 1942 aningkan Quit India movement ahut pensi alang ratchari along kacheklang dun. Ningkan pho angbong alang RSS Pracharak man lo. Lomso vet apor angbong Jana Sangh (non ke BJP) along amen chethang lo.
Halaso ahut a prime minister Indira Gandhi emergency kapangdak ahut alangphan 1975 pen 1977 aningkan an jail thap lo. 1977 aningkan PM Moraji Desai a cabinet along alang external affairs minister long dun.
Vajpayee, parliamentary along kedo dun ningkan plikep ajak do. 1957 aningkan pen lo lang Member of Parliament kelong dun. Lok Sabha along phong kep lapen Rajya Sabha along phong ni dodun long lo.
1992 aningkan alangphan Padma Vibhushan anongnam pen archo lo, sonsi 2015 aningkan alangphan
India a President arideng pen Bharat Ratna anong-e ta pajir lo.

Leave a Reply

Your email address will not be published. Required fields are marked *

BREAKING NEWS
August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives