ADVERTISEMENT

This area is available for advertisement. Please contact for details.

Arnivang
Get Adobe Flash player

Kechopanglim ahin jumlo: CM Sonowal

Khanapara along alir-alon pen I-Day katalon kichun

GUWAHATI, Paipai 16: Detpi adangpi arlo ingdeng 72 Independence Day katalon along pacheton dunsi Guwahati Khanapara alongta Assam chief minister Sarbananda Sonowal arideng pen detpi alama ingthur dunsi alir-alon pen talon dunlo. Laso ahut Independence Day apharman rat aphan hirjume pajirsi chief minister Sarbananda Sonowal kejaike Assam state kapachingthurji aphan ratpangri pen kado kave asai cheparideng lo. Assam aphan kachopanglim, klempar lapen temon langno pen kapajokji aphan bor–iji pu ningjesi khei apo Mahatma Gandhi pen danglok kacheksong anokbe atum aphan chikimo. Alangli kaningje thuke nelitum a ratpangri kangni pen state along aronre pen nangkilut angtan asor atum aphan ketoi etji aphansi lamchak chipilo. Laso along NRC ateng pen kengkam isi chejor lo. NRC henlo ilitum aphan keraikok arisim lo, lasi labangso NRC along ahokpet India amonit inut aphanta palom pon longle lapen ladak angtan amonit inut aphanta kaparlo longle detrji aphan nelitum aratpangri kelang pangching dunlo. APSC alamki aphuthak alangli hosi kachopanglim ahin khang unlo lapen administration asai ansose kangthirjir lapen angton pen kachopanglim kapavirji aphan sai dengji pusi rat aphan ning pathe. India-Bangladesh ahoi kanghap, Assam accord along ason-ason a paragraph kapachunji aphan, akimi longle aron keklemji aphan, National Park lapen reserve forest heihui longle keraikomji aphan ratpangri pen sai kedeng aphuthak rat aphan pachini. Chief minister Sarbananda Sonowal karlitang Bhaskar Kalita aphanta chikimosi alangli kaningje thuke kedamtang aningkan pen pangbar dam pulote state along keton kelang ahin penang an chingthurlo. Kaziranga along okhung nangjum bomlo pusi alangli jongponsi Kaziranga National Park along keton-kelang Forest asaikhi atum aphan mesen-mesen arisim pajirlo. Kedamtang ningkan hini angbong bang 170 okhung atum police arideng chingnang lo. Okhung atum aphuthak kangsaiji aphan hum 10 fast track court pangnilo pusi ningje. Alangli kaningje thuke state adangpi kaprek-kaprek adim along rong 4 crore 50 lakh thengpi aklim eh lo lapen kevangji arnita eh bomji. Kaziranga lang kanglum ahut marat api keraikomji aphan long 33 highland selamlo puta ningjesi kaprek-kaprek industry atum Assam along investment aphan kengkam nangchejorlo. Guwahati, Bhutan lapen Bangladesh commercial pangnilo. Kedamtang ratpangri ahut kapatang thekthe hum 3 lakh IAY ahemso kikim patanglo lapen PMAY saideng (scheme) pen sika 1,98,000 atangka pen hem kimbom lo. Subhaigya Scheme pen adontin me rihing kapaleji aphan chisiklo, kedamtang ningkan hini angbong don 32,52 lakh ahemtun atum aphan kereng avarsai pilo pusi ningje. Halapu Ujjwala scheme pen don 19 lakh atum aphan LPG akejoi pen ronlo puta chief minister Sonowal ningjesi rong-rup arlo 9842 km atovar along kaselamji aphan ratpangri ahin pen denglo pusi rat aphan pachini. Alangli kaningje thuke kevangji arni hum 1000 thengpi a dolong along RCC a dolong kaselamji aphan sai dengsi laso angbong hum 200 thengpi a dolong along RCC a dolong selam bomlo. State arlo NH atovar ajak kiding 3,800 pen 7000 km an pakam thulo. 1844 km state atovar aphan national atovar pangdang lo. Brahmaputra aroi athak Bogibil pen Kaliabhumura along dolong hum ni selam bomlo lapen Majuli along mesen pen kacheleng longji aphan hum pli akimi atelong (ferry) avarsai bilo. Halapu sai katiki ahinta alangli ningjesi sai katiki ahin ale kapadoji aphan subsidy pen tractor lapen health card pajirsi ason-ason asai dengsi ratpangri pen sika 30,000 crore atangka padamlo puta alangli rat aphan pachinisi angtan pen nangkele a-ok along formalin kipi-kipipe aphuthak lamki kedovoi angbong pini chief minister kaningje ke kedamtang aningkan aphante state along 20,000 metric ton alang ok kamlo pusi ningje. Alangli kapathu ahin ningjesi World Athletic along ser anong-eh kelong abangphi Hima Das pen kacheteng along ser anong-eh kelong Angkushita Boro atum aphuthak ningjesi Independence Day laso kangthedung arni Assamese abangphi atum ansose paprang dunpo pusi alangli ning chethe. Village Rock star pen pirthe adangpi kachethang Rima Das aphanta alangli kachoro pajir.
Chief Minister Sarbananda Sonowal kaningje thuke state arlo pherangke atum aphan kapachingthurji aphanta ardi pisi bang 31 pherangke ahemtun atum aphan lakh 5 atangka kapajir lapen asai arpu kijut tang bang 20 pherangke barim lapen bang 20 pherangke atum aphan media fellowship pajirlo pusi ningje. Lasonsi alangli kechari aratpangri along ason-ason asai kedeng aphuthak rat athengno ningje. Arni kesopik ajok katalon alongklam along ajahak keton-kelang asaikhi atum krep rok pusi chini dun.

Leave a Reply

Your email address will not be published. Required fields are marked *

BREAKING NEWS
August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives