ADVERTISEMENT

This area is available for advertisement. Please contact for details.

Arnivang
Get Adobe Flash player

Hemprek longletik sang nangne: CEM

72 Independence Day

imageDiphu, Paipai 14: Det adang penap 72 angdeng Independence Day katalon ahut Karbi Anglong district ahempi along Karbi Anglong Autonomous Council a Chief Executive Member Sar Tuliram Ronghang arideng pensi det alama pachipur lo.
Lama kapachipur ahut CEM Tuliram Ronghang lamthe jaije aprang det jokvan ahut kachesong along apran kedam Mongal Pandey, Bhagat Singh, Chandra Shekhar Azad, Mahatma Gandhi lapen kaprek-kaprek atum aphan chikimo. Lamthe kejai ahut thihek pen Karbi district aphurkimo lapen sixth schedule ajakong aphuthakta Karbi Anglong Autonomous Council a CEM Tuliram Ronghang Independence Day katalon amai along than.
India prime minister Narendra Modi akemang ‘Sabka Sath Sabka Vikash’ pu ateng sixth schedule alongri along khei kacheprek alam chipupe pinsi do rappet thak rappet pen kado kave ta chingthur rappet lonang pusi mai along CEM Tuliram Ronghang jai.
Karbi Anglong kapachingthurji aphan pusi voreng kave loh kethek okkarjang (Youth) atum aphan council kaparlo asaikam along chokamar anghoi kejoi kedo-an peksi papleng bom lo. Lason thak death vacancy heihui loh kethek abangphu-phi atum aphan pek lo puta alangli jai. Grade III pen Grade IV a chokamar atum aphan a interest jumhek a loan pilo.
Thengpi-thengprang kapajokji aphan pusi akejoi pen LPG ron lo, kachiti ahem akejoi pen kim pilo, hem kachikimji aphan ajakong kave det atum aphan PMAY ahemso kim pi lo. Sai kachotiki atum aphan tractor ron lo. Diphu pen Donkamukam along chot kali constituency 26 alongta mesen pathu aklam do nangji pusi a constituency tin aphan sika crore 10 atangka panong lo. Kacharli ahin kapachingthurji aphan pusi West Karbi Anglong Rangsina College along science stream bi lo, Hills Medical College pini aningkan angbong ingpupo, Hamren along 200 bedded hospital, Bokajan along 100 bedded hospital, West Karbi Anglong along B.Ed college, Diphu along government law college heihui kapangniji aphan klem bom lo.
Alangli Diphu alangroi kapalangme asai kedeng aphuthak jai, kachingthur asai klem bom nangji lapen hemprek ta hang bom nangji lapen hemprek longle tik sang nangne puta alangli jai.
Hemprek hang nangji seta hemprek amen pen chesar nangne, hemprek amen pen che boycott nangne, hemprek amen pen hem-rit chipri nangne puta alangli jai. Ingsamjin pen hemprek hang bom lonang, hang bom lote arnisi ke hemprek longevekji puta alangli jai.
Independence Day asaimo (Programme) ateng methang jongjung lapen kaprek-kaprek ratpangri asaihem (Institute) along porphai 6 pen porphai 7 angbong lama ingthur lo. Laso aphi porphai 7:30 pen porphai 8 angbong Diphu ahithi angbong charli osomar atum Independence Day kapachethang armu chejeng. Porphai 8:30 apor Diphu Gandhi Park along karjap dong det apo Mahatma Gandhi akumlin along mir alek arvak dam lo. Laso aphi porphai 8:55 apor pen Independence Day katalon aklam Diphu Govt. Boy’s HS School pathu aklam along alohi sarpo kapale pensi katalon ajaimek pangchengsi army, police, home guard, NCC lapen charli osomar atum penta parade chepaklang po. La-an chot kali kaprek-kaprek asaikam atum pen kelan kachepaklang ta laso ahut pachejeng dun po.
72 Independence Day katalon ahut tokbang Rupsing Teron aphan literary pension, abarim pherangke Nogen Bora aphan journalist pension heihui pilo. La-an chot kali march pass kedam atum aphanta nong-eh pajir lo. 
Katalon aklam along Karbi, Dima, Hmar, Kuki, Rengma Naga, Bodo, Manipuri, Panjabi Gorkha, Adivasi lapen kaprek-kaprek akhei amethang ajutang kekan lapen det kachinghon akekan ta kapaklang.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives