ADVERTISEMENT

This area is available for advertisement. Please contact for details.

Arnivang
Get Adobe Flash player

UPLA monsam akrong kevangji aphan chekroi lo

Diphu, Paipai 13: Art of Living founder Gurudev Sri Sri Ravi Shankar pen Assam chief minister Sarbananda Sonowal atum aning kaparung ateng United People’s Liberation Army (UPLA) atum ajirding klui pen akemang kachepachunji aphan democratic ateng kachesongji aphan monsam akrong along kevangji aphan cherai lo. Laso kapangdak ahut Karbi Anglong pen Dima Hasao arlo klempar asong a chairman Sorjon Loeh kaningje ke, “Sri Sri Ravi Shankar ji aning kaparung lapen Assam chief minister Sarbananda Sonowal mesen pen nang kachejok dun. Laso aphi Karbi Anglong Autonomous Council a Chief Executive Member Tuliram Ronghang ji lapen alangli keklem rappet arisangho atum aning kapathe alam longsi netum ajirdingklui pen akemang kachepachunji aphan democratic atovar chongvai lo.
Risim pen kachesong kesangji aphan chekroi lo. Laso ateng kache-ap kangton mate ceasefire lo pusi state pen central atum athengno chepangdak lo. Kevangji arni netum akemang ason kachepalongji aphan kachingki chethan pensi chepachun po.
Lapuson netum keklem pen kado kave ahin prapjin pen chingthurpo, monsam aphan klem po lapen Karbi Anglong arat akar-i song pen kapachunji aphan klempo pusi ning chepathe lo puta alangli ningje.
UPLA kedamtang asong kedam 2013 aningkan Thangthang achiklosi amahang pangthek lo. Laso asong India constitution along kedo article 3 ateng Karbi Anglong aphan separate state kapaselamji aphan la-an arni risim kangtang pen chesong lo. “Karbi Anglong arlo kedo ratchari asong do-an, hamphang asong do-an, charli ahamphang, so-arlo asong lapen Karbi Anglong ceasefire group kedo-an atumta isivet alongklam along arjapsi Karbi Anglong arat akar-i kapaplengji aphan klem rappet nangji aphan choningri lo pusi pacherap chunbang i/c pachethang Young Tungjang ningje.
“Gurudev Sri Sri Ravi Shanker’s aprang kachechar abangphusi democratic aron ateng kemang asong kachepachunji aphan aning nang parung lo. Alanglisi kado kave kedo akrong along kevang pen netum akemang aphuthak ajirdingklui kachesong achethe kapadingji aphan tovar nangja lo pusi pacherap chunbang i/c home affair Songsarpo Tungjang ningje pusi birta nangpale.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives