ADVERTISEMENT

This area is available for advertisement. Please contact for details.

Arnivang
Get Adobe Flash player

Baithalangso Town Committee kepangdak

imageDiphu, Paipai 11: Baithalangso angkang pachingthurji aphan pura hadak arat atum kachoningri ateng pini KAAC CEM Tuliram Ronghang arideng pen Baithalangso Town Committee pu pangdaksi asaihem kimi ingpu.
“BTC aphan KAAC kedeng amai along EM Ratan Teron kachepahemphu amai along HAD Minister Sum Ronghang alohi sarpo aman pen chetong dun.  Anparta man peng alohi aman pen CEM Tuliram Ronghang, MLA Dr. Mansing Rongpi,  KAAC chairman Longki Timung,  EM atum Amorsing Tisso,  Kache Rongpipi, lapen Rupsing Teron, MAC atum Prabhat Ch. Taro,  Lunsing Teron, Ramsing Timung,  Rina Terangpi,  Pawan Kr.  Rai, Mongalsing Timung, Horen Sing Bey atum chetong dun.
“Bangso amai along Baithalangso arat atum aphong aphong Baithalangso ahithi along town pinchong nangji mate deng nangji pu ajoine EC amai kangni along kacherai ateng si pini KAAC denglo. Laso asai along hadak armu aphai kalakha ateng pensi ward no 7 an pathik lo. Baithalangso Towm Committee keparlo lake Duar Amla constituency,  Socheng constituency lapen Rongkhang constituency angkang henlo. Lasi, piningkan angbong Baithalangso Town Committee along setame kilik pangni po.  Anparta BTC along prapjin pen Dumper truck, dustbin pen chenglok kaprek kaprek kenangsot ahormu pi pajirpo, lasi ward no. 1 pen 7 angkang tin kevangji Paipai 15 aphi lote kacheleng atovar,  meh lang heihui pen chenglok kaprek kaprek scheme dengpo pusi CEM Tuliram Ronghang jai.
“Lasi,  pini penke arongtin methang methang arong kachepangthir etji aphan anuttin abangphu bangphi atum setame bor-i nangpo. Athe town committee keparlo pulote hithi pen chenglok rong rup arlo anta kepangthir kenangsot,  pinpurme,  KAAC keparlo non an long 9 town committee pleng tanglo. Lasi,  Town Committee kilik along BTC kaparlo 7 a ward along anta BJP atumsi hai etpo pusi ningthelo lapen kevangji 2019 aningkan nangle lote Kheroni ahithi along ta town committee pangdak po puta CEM Ronghang jai.
“Rong aphan mute Baithalangso ahithi ter nai lo.  Seta Bharat Swachh Abhijan do apot laso ateng klem lote hithi ingthirji, anparta Baithalangso along town pangdak lo pulote ladak longle pen chenglok hem ador batpo lapen midu ta kelong bat chet po lapen anparta ason son ahormu lapen chojor cholang anat paprang dun po, jasemet town committee along pulote bang pho ansi chokomar atum dochotji. Seta ejahak town committee alongke bang 15-30 sose achokomar do.  Lake chairman lapen ward commisoner amonit pu ajoinesi chokomar aphai bat aret titi. Laso ajoine si achiklo abainong pi un e det titi lo. Lasi laso ateng klemkle ra mesenji aphansi klem pon nangpo pusi HAD Minister Sum Ronghang jai.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives