ADVERTISEMENT

This area is available for advertisement. Please contact for details.

Arnivang
Get Adobe Flash player

Ahoi alongle echet ta kachekoinot State aphan papon longle: WKA DC

imageBorgaon, Paipai 11: West Karbi Anglong arlo Meghalaya ratpangri atum pen nangkikim kaprek kaprek ahormu District Admistration atum atumi Bhomta arni kaphalangno dam.  West Karbi Anglong a district administration ahin pen ADC jalinsi Assam police asaikhi atum pen chenglsi Meghalaya asor crore atangka kaselam ahormu JCB pen phalangno dam lo.
Meghalaya pen West Karbi Anglong district ahoi kedo West Karbi Anglong arlo Meghalaya asor kaprek kaprek aronre kachingthur asai nang keklem aphuthak aphong aphong chingki chingvai si kangtonji aphan pachini lo. Seta alangli sai nang keklem ingtontesi West Karbi Anglong arlo Hawang, Khili, Umwang heihui along kaprek kaprek kachingthur asai nang klem lo.
State hini angbong mate West Karbi Anglong district lapen Ri-bhoi district angbong aphong aphong kachingvai alam Meghalaya asor ardi en-eh det asonsi thek long. Laso ajoine ahoi along kaike ta soluk sodak kapadoji aphan keklem asonsi thek long.
Meghalaya asor lapuson asai nang keklem chechak un-ehsi West Karbi Anglong district admistration atum atumi Bhomta arni Meghalaya asor nang keklem asai do-an phalangno dam et lo.
Methang ahoi kaheraiji aphan aphong chingki chethan lo, seta alangli tum kapatoite det ajoinesi lapuson angdeng an dam nangkok lo. Assam alongle inch isi ta kachekoinot state atum aphan papon longle pusi West Karbi Anglong DC Debojyoti Hazarika ningje.
Meghalaya asor lapuson Assam alongle nang kacheraiji aphan klemkle nangji lapen lapuson aronre longle nang kacherai kabor-i atum aphan un-an khang dunji puta Deputy Commissioner Debojyoti Hazarika ningje.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives