ADVERTISEMENT

This area is available for advertisement. Please contact for details.

Arnivang
Get Adobe Flash player

Temon langno kejap thuthe detji aphan chingrumpet arnam kardom

TomonDiphu, Paipai 10: Kedamtang Vosik 8 arni Panjuri Kachari arong along kepho ahoni ason Karbi Anglong nahok adimta kephophe detji lapen Kangthilangso ahavar along amatta lason ahoni kepho thuthe detji aphan pusi HTL, KSYC, KRAA, KAKA heihui a hamphang asong pen chenglok kado kave hamphang asong 15 atum chelangsi honi kanti kapadam lapen kado kave chelangpet arnam kardom ajaimek deng lo.
Laso ateng atumi Paipai 9 arni Kakhre Sankar Milik pen patirpisi Karbi aron ateng honi kapangthir lapen honi kanti kapadam asai klem lo. Laso aphi pini kado kave chingrum pet arnam kardom asai deng lo.
Jaimek ateng todap porphai 7 apor pen porphai 9 apor an Karbi Anglong arlo kedo adhorom tin atum chingrumsi amethang methang aron mate amethang kekroi arnam aphan ardomsi ahirjume chohang rinti lo.
Jaimek ateng Karbi aron barim apharman Kaibong Kro arong asar Kurusar Kamsing Kro pensi sai angdeng do-an chari lo. HMA ameiphu Lunse Timung lapen Karbi Jutang Jubat Asong pen Jorsing Bey atumsi aron ateng kurusar aphan ingthom arne dam lo.
Anerlo chitim porphai 12:30 apor tirikam ameiphu pen chunbang atumsi alohi atum aphan ingthom arne lo. Laso aphi arnitili porphai 1 apor monsam apharman rat amaipi ingni lo. Mai along alohi sarpo aman pen KAAC Deputy chairman Ritesh Inghi chetong dun. Mai along anong kachethang klong cheparjan bangphu Rajiv Kro, Kamrup KCS sankur chunbang Dhireswar Ronghang, KLA ameiphu Suren Kramsa lapen hamphang asong 24 a convenor Ratan Terang pen chenglok kaprek kaprek man kedo atum chetong dun.
KRAA ameiphu Dhormo Sing Teron kachepahemphu amai along KAKA ameiphu Jana Teron pensi alohi kapachini apor en lapen KRAA chunbang Rupen Hanse pensi mai kepha alamthe jai.
Mai along kachetong dun alohi KAAC Deputy Chairman Ritesh Inghi pen chenglok kaprek kaprek alohi atum pen Karbi mate inglong aso atum ning isi kedo nangji aphuthak jai. La-an chot kali kaike monsam pen kedoji anparta monit angbong korte morti ason kachinghon thekji alam than. Monsam jongsi dolo longri longpat ta chingthur po lapen nong thangta jumesen po pu heihui alamthe jai.
Mai kapajut ahut HTL convenor Saising Rongpi pen kachoro alamthe pajirsi mai ingsamjin pen pachekak lo.

Leave a Reply

Your email address will not be published. Required fields are marked *

August 2018
M T W T F S S
« Jul    
 12345
6789101112
13141516171819
20212223242526
2728293031  
Archives