ADVERTISEMENT

This area is available for advertisement. Please contact for details.

Arnivang
Get Adobe Flash player

Kt. Riswel Teron Memorial Football Tournament angdung kiti

UMPANAI, Paipai 10: 2018 aningkan karlitang Riswel Teron Memorial Football Tournament anong-eh Hills United aterank si chepalong lo. Paipai 8 arni Umpanai kapathu aklam alongsi angdung kiti chepate Hills United pen Klirthang angbong chepate lo. Minute 90 hin-hin angbong kachepate ahut Hills United ahin pen Klirthang aphan goal hini thapsi chepahai lo. Kecheng minute 45 kapathu ahut goal isi lapen kesangdet aphi goal isi thap thusi goal ni pen chepahai lo. La hini a goal ta Jason Rongpi si thap lo. Klirthang aterank ta goal kethapji avarsai penang an longlo bonta Hills United a goal kanghong abang keprap lapen kethekpik ajok gaol palut un-eh det lo.
Parnodamme, kt. Riswel Teron ke Amri-Chinthong ahavar angkang anle anongnam kachethang abang chot lapu kali bonta Karbi Anglong angkangpi amatta ehut isi anongnam kachethang abangphu lo. Alanglita inut Karbi khei anokbe pusi ongdung atum puhur. 1925 aningkan alangli Umpanai arongsi amahang thek lo. Umpanai Mission LP School along pen charli det aphi Shillong Govt. High School pen matric angdeng chepa-un dun lo. Halabangso ahut Karbi angbong matric ki-un atum kang-ar piklang ahut alangli mesen sen sorkar achokamar keklem avarsai long seta methang arong lapen akhei aphan kachinghon pik ajok Karbi arat aphan kathe-ang atovar anat kejaponji aphan pura Umpanai ME School cheng linlo. Lasi Umpanai ME School ke Karbi Anglong angbong abarimnei lapen isivet English ME School lo. Alangli ke Amri-Chinthong atovar kaikimi akathe-ang kevan cheng abang lo.
Angdung kiti kachepate arni suri si rong aso atum cheto dun pen ning arong chipidunsi ardi pidun lo. Angdung kiti amai along Umpanai High School thanbang kehoi lapen Society for Promotion of Karbi Language (SPKL) ameiphu Welcom Teron alohi sarpo aman peng pen chetong dun. Rong asar lapen Umpanai ahavar penang an amonit atum bangso kachepate along chetong dunsi ardi pidun lo. Kt. Riswel Teron inut khei aphan kachinghon pik amonit lasi ilitum jokta alangli keklem tekang keklem dun thekji aphan alangli kengkam aphi aphi chibi dun nangji pusi alohi sarpo Welcom Teron kachetong arat angno jai lo.

Leave a Reply

Your email address will not be published. Required fields are marked *

August 2018
M T W T F S S
« Jul    
 12345
6789101112
13141516171819
20212223242526
2728293031  
Archives