ADVERTISEMENT

This area is available for advertisement. Please contact for details.

Arnivang
Get Adobe Flash player

International Day of World’s Indigenous People’s katalon

IndegeniousDen Arong, Paipai 9: Todap porphai 10.30 apor Diphu Jirsong Asong asaihem along Karbi Human Rights Watch atum pen International Day of World’s Indigenous People’s katalon.
Indigenous peopl’s Migration & Movement aphuthak kachingki chethan amai along deputy chairman Ritesh Inghi, Thekar chapbang Longsing Teron, MAC Dorsing Ronghang, J.I Kathar, Suren Kramsa, Khorsing Teron atum chetong dun.
Mai along Jintu Kro pensi along kachetong dun alohi atum aphan pachini lapen mai along Pankaj Teron pensi mai alamthe jai lo.
Mai deputy chairman Ritesh Inghi pensi ingpusi chingki chethan amai pangcheng lo. Mai along Thekar chapbang Longsing Teron pen kejai ke, pirthe adang along pini Worlds Indegenous Day pu kehok ke pini pen mo 2030 aningkan an ke dothak rengmesen kelongji aphansi adet tin alongta khei barim atum akiduk kisung pen joike joivan kedokethak longji lapen khei barim atum alam aki, pindeng sumpot anparta jutang jubat kachirim thekji aphuthak jai. Seta ilitum kethek longphrong ke bihu Durga karkli, Chhat karkli,  Kali karkli sonsi prekjam kaprek akhei atum a dhorom si itum ke rim dun rong tap aret lapen methang alam anta pini anke choklim kaningje atum eng-ar tang lo. Lason ajoinesi ilam iki ingbo bom lo pusi Longsing Teron jai.
JI Kathar kejai dun ke, kheibarim aphan jongsi ahokpet pen chiraiji pulote akisung dobinong, athe 1953 aningkan Assam sorkar atum pensi longle phelang lamki lam phong aphanta aron kaselam nang chirai pini latum alongsi do-et, amat ili akisung do anta nang pajok dunde det, lahai aron ke methang alongsi donangji apot lo, lahai aronke Article 3 pen 2 along lang lote ili long etpo, Ili kave ajoksi hakopen kerai alongle phelang anta longle kejoi pu amat sorkar atum nangthi chet chet amat pon bom lo. Lasi pini anke ilita aron atang kachini akenangsot lo puta lam phar dun.
MAC Dorsing Ronghang pen kephar dun ke, Khei barim angbong pen akiban nei ke Karbi atum hen lo, athe British atum India vangve aphrang penta nampi namdur ajo kaphuri akheilo puke British ratpangri atum nang chinipame, Lasi latum ke kheiso pinak apotsi mo arnisi latum aphan isi aron akenangsot pu mathasi ajahak keraikom aron nangthik pitekang lo.
Kisung apot pinap jokvan longnangji pulote aphrangsike elongle phelang aphan chiraikom dun thek nangji alang. Non ason Naga. Khasi ahoi anta chepangthek pame nangji, chirai thek pame nangji, kaprek akhei atum nangkithi ili chini dun chekhang dun thip thek nangji. Seta non ke ilitum angbom kethek keprekjam lapen aning kamatha isivet kave det ajoine bang atumsi ale nang long dun bom lo. La-an chot kali ning isi vet kave anuttin kamatha keprekjam ajoinesi hemprek ta longle det lo, lasi kopisi kechokche konatsi kechokche chepangthek pame nangji. Non ateng jongsi alamthe prekjam pulote ilitum ke hemprek long derchetji pusi JACAS Khorsing Teron phardun.
Suren Kramsa pen dhorom aphuthak kejai dun ke, Christian adhorom kirim atum ke joi thuke ason, athe latumke isivet, ante ili aron barim atum ke ongdung atum thekre muchot atum penta penang an chethan lo, Hindu putong kachetok poma mate Hemphu adhorom pulo puta rat aphan arju.
Mai along penang chingki chethan det aphi mai along kachetong dun atum aphan an kachoro pajirsi mai pachekak lo.

Leave a Reply

Your email address will not be published. Required fields are marked *

August 2018
M T W T F S S
« Jul    
 12345
6789101112
13141516171819
20212223242526
2728293031  
Archives