ADVERTISEMENT

This area is available for advertisement. Please contact for details.

Arnivang
Get Adobe Flash player

Bang 3 MAC atum pini Diphu Judicial Court along kacheklang damnang

Chiti 15 arni pensi karju pado thuji

Screenshot_2018-08-10-16-05-12-373_com.whatsappDIPHU, Paipai 9: Inglong aso kalidet abangphu atum Sixth Schedule kaparlo Karbi Anglong Autonomous Council along kilik kachedan dun aron kali pu jongsi kedamtang 2017 aningkan KAAC kilik aprang aprang bang kethom abangphu atum bang kethom MAC atum aphuthak Court along Civil case pidetlo. Bang kethom MAC atum aphan lamhoi kipike Bokajan Constituency MAC mate KAAC EM Madhurjya Dhekial Phukan aphan Pranjan Kro si Diphu Chief Judicial Magistrate along lamhoi pilo, Deopani Constituency MAC Mukut Mahanta aphanke Chandra Teron si lamhoi pilo  lapen Kopili constituency MAC Pavan Kumar Rai aphanke Dhon Dera pen Goneswar Rongphar atumsi Guwahati High Court along Public Interest Litigation (PIL) pilo. Laso ajoine Paipai niphai 9 arni Diphu Judicial Court along bang kethom MAC atumta cheklang dam nangji pu atengsi pini bang kethom MAC atumta Court along nangcheklanglo setame pini abangke alanglitum kachenep advocate atumsi laso aphuthak Session just aphan charju damsi puthot hearing aphan apor chohang lo. Laso atengsi Court ahin pen puthot Chiti niphai 15 arni si hearing pado thupo pusi apor pilo Halabangso arnisi MAC bang kethom atum lapen halapu lamhoi kipi atum angbong ajakong chelangpo.
Lamhoi kipi atum kachenep advocate mate Gauhati High Court advocvate Manash Sarania aphan pherangke abetung karju ahut alangli kaningje ke, Sixth Schedule kaparlo Karbi Anglong Autonomous Council 26 constituency anghoi lake inglong aso atum aphansi raipilo lapen inghoi pli abangke nominated anghoi aphansi railo. Lasonsi kedamtang 2017 aningkan KAAC MAC kilik ahut Bokajan, Deopani lapen Kopili la kethom Constituency penta ongdung candidate atum nomination file jok dunsi bangkethom atum kilik haidunlo. Hala bangkethom atum inglong aso kali. Lasi ladak sixt alongri alongke Inglong aso kali atum kilik kithur dun abangke sixth Schedule aron ateng pen damde det asonlo pusi advocate Sarania ningje. KAAC kilik ahut inglong aso kali atum kithur dunpo ajoine kaprek-kaprek atum laso aphuthak lamhoi pidetlo. Laso alamhoi Election Commission along lesi Governor proses det aphi  puthot Hills Area Development Ministry along anta lelo laso aphisi ladak Diphu Judicial Court along  an nangtoilo. Pini Petician advocate pen  respondent advocate atum anta nchetong dunlo. Setame respondent ahin pen apor kachohang ajoine puthot Chiti 15 arnisi Court hangthulo mate hearing pado thupo pusi ningje. Advocate Sarnani kaningje thuke Inglong aso kali atum vote kipi ajakong abang ingthanthe lasi laso alam pen kado kave atumta monsam kapathirji aphan alangli choningri. Halapu Karbi Anglong along Bodo atum Inglong aso kalidet pusetame Bodo atum aphan non inglong aso ajakong kelongpo lasi tiri ratpangri atum prapjin pen Karbi Anglong pen Dima Hasao district alongta Bodo atum aphan inglong aso ajakong kipiji aphan chisiklo pusi ningje.
Pini Diphu Judicial Court along EM Madhurjya Dhekial Phukon, MAC Pawan Kumar Rai lapen Mukut Mahanta atum kachepklang dam ahut KAAC Deputy Chairman Ritesh Inghi, BJP East Karbi Anglong district ameiphu EM Raton Teron lapen ongdung BJP atoi ani atum chetong dun halapu lamhoi kipi ahin abe kidun atumta ongdung chetong dun.
Pini kechengsi hearing kapadoji along api alo patina tahai pusi ongdung arat atumke chonghonglo setame apor kachohangthu ajoine pini abangke apo alo patina thekthe detlo puthot Chiti niphai 15 arnisi ajat alamrai ta longdunpo.
Pinpurme Ongdung Karbi arat atum laso asai kedeng thek aphuthak kachepatirpi atum aphan ning kangsam chepaklangsi kurvangthu kapajir atumta do lapen laso asai along khei angbong kachelang selet lapen kacharvoji aphanle lapuson keklem kali athe kedamtang 1951 inglong aso atum aphan isi ajakong kipi do lake Sixth Shedule henlo lasi laso Sixth Schedule aron atengsi alanglitum karjap puta ongdung arat atum ningje.

Leave a Reply

Your email address will not be published. Required fields are marked *

August 2018
M T W T F S S
« Jul    
 12345
6789101112
13141516171819
20212223242526
2728293031  
Archives