ADVERTISEMENT

This area is available for advertisement. Please contact for details.

Arnivang
Get Adobe Flash player

Mahamaya a Congress jakong cheharjak

DEN ARONG, Paipai 8: Pini Mahamaya constituency angkang Jungthung, Matikhula lapen Pung Aji arvi ar-eh anat kelang chari aban booth committee prisi akimi booth committee keseng amai pangni. Mahamaya constituency angkang Congress angkur aphelong pen kapangtangji aphan EM barim Bidyasing Rongpi ke-ot dun kapangtang kapangcheng thu.
Jaimek ateng kechengsi Jungthung PCC booth committee keseng amai Sondro Sing Singnar ahem alongsi akimi kelang chariji aphan arpu kepek amai pangni. Jungthung PCC booth committee kapangtang thuji aphan akemang pen Borsing Timung aphan meiphu, Mohori Bey aphan chunbang arpu peksi kado kave bang 37 atum aphan klembangphu/phi atum aphan ingvaisi seng lo. Bangso aphi Matikhula LP school ahem along si kapathik. Matikhula PCC R/W pen Burasing Timung aphan meiphu, Sing Kro aphan chunbang atum aphan arpu kepek along bang 37 atum aphan klembang phu/phi ingvai lo. Lasonsi L/W anat along kelang chariji aphan Harsing Timung aphan meiphu Bhupen Timung aphan chunbang atum aphan kangvai along bang 37 klembangphu/phi thap lo. Pung Aji PCC L/W  along Bijoy Kro aphan meiphu, Angjok Ingti aphan chunbang lapen R/W anatthu ke Longbi Hanse aphan meiphu, Bidyasing Killing aphan chunbang lapen Mongalsing Hanse aphan bidisar pek lo. Lasonsi a PCC tin alongta bang 37 aphai klembangphu/phi amen thap lo.
Pini palong thom booth committee keseng amai tin alongta EM barim Bidyasing Rongpi pensi mai chari lo. Keseng amai along alohi aman pen APCC dun meiphu Anil Bora chetong dun. Lasonsi chopha alohi aman pen mondol committee pen Phukon Ronghang, Davit Ingti, Sondro Singnar, Babu Timung, Pankaj Bora, Ronjit Teron, Mohila Mondol pen Anjuly Lekthepi, Junaki Rongpipi, Purnima Teronpi, Junaly Ronghangpi lapen Rupaly Ronghangpi atum chetong dun.
Mahamaya constituency angkang madu jabang tame ahokhe a Congress kali pulote Congress amen en pen mai nang pangni thapri pusi EM barim Bidyasing Rongpi jai.
‘Nanglitum nonke monit kere mate kaipharlep akai pinak apotsi non MP kilik aprangke netum helo ahok a Congress lo pu pen mai thai along monit nang kachetong dun nang bor dun pikji’ pusi booth committee keseng amai along alohi aman pen Anil Bora jai. Jongsi Congress amai pangniji pulote nini aprang si nangparjuji lapen amai alongta APCC jabang penta nangchetoi dunji. Akaprek ajabang aphan nang kachetong dun pulote halaso amaipi ke Congress amaipi pu hok dam nangne. Ajahak jabang atum Congress amen ke-en abang dojai lasi manghu dun nangne puta alangli jai.
Ajahak jabang atum MP ticket long dunde pulote akaprek atovar rip si jong jung arjap dun rong asai klem rong. Lason kedo palongka jam aphan madu aphan kroi nangne anparta mai kangni ahut ahokhe Congress jabang amen pinpurji seta lahai kapinpur chot atumke ahokhe a Congress lo. Lasi lahai atumke Congress ajakong kapabopji abidisi klempo puta Anil Bora pen EM barim Bidya Sing Rongpi mai along jai.
Komat aphansi ticket kipi nangji abangke angsong pensi ingvaiji ladak chepathek vong un-eh lasonsi non kikhi bom a MP Biren Sing Ingti pen Gaurov Gogoi aphanke kevangji MP kilik along kachedan dunji aphan kangvai tang lo. Alanglitum non adihu ta chehai thuji aphan ari kok dong lo pusi ning chethe klong alam jai tekang. Ahokpet keklem chepaduk along cherap cheto dunsi non kevangji MP kilik along kachedan dunji abangphu Biren Sing Ingti aphan kapahaiji aphan chesik chedang nangpo puta jai.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives