ADVERTISEMENT

This area is available for advertisement. Please contact for details.

Arnivang
Get Adobe Flash player

Assam-Nagaland ahoi alam aphuthak DC arideng pinpur aloh kapajir

I-Day aphi Dimapur a DC aphan nang pachetong po pusi hamphang aphan DC kachechak

IMG-20180808-WA0012DIPHU, Paipai 8: Karbi Anglong alongri arlo Daldali kerai anampi Dhansiri angkang Lahorijan pen Shankar Tilla BOP along aronre pen Nagaland asor longle nang kacherai aphuthak Karbi Anglong ahamphang atum chelang si pini DC aphan pinpur aloh kapajir.
KSA KSU, KSYC, USUKA, AASU lapen ADSU ahamphang atum chelangsi non hetjong Assam pen Nagaland ahoi Daldali kerai anampi Lahorijan pen Shankar Tilla BOP along humri dam. Kahumri dam ahut pu-pu ahavar chepangthekji aphan kesom anujok amokha ta phur lap lo laso angbong pillar no 7 ansi thek dam long chot. Ahoi anujok kesom adim pen arlo nanglutsi Karbi Anglong alongle arlo pucca pen kacha, paisong lapen ita arpong heihui nang chekim lo. Kethedung atalom anampi pangthaisi hem rit nang chekim lo. Lasonsi non hem rit ta nang chikim thu bom lang lapen langteng heihui ta  kihut thek dam long. Laso ateng pen langdam pulote police asaikhi atum patrolling asai dengde det lo. Karangkha asai kedengde det ajok kedam kevang ta joike ason cheman det lo. Anparta rihing ameh pen danglok tovar heihui kaselam avarsai ta nang dokok lo. Lasi aronre pen longle nang cherai atum aphan prapjin pen khang nang po pusi pinpur aloh along jong dun.
Assam pen Nagaland ahoi along BOP pathir si aronre pen nang kilut atum aphan khang dun unpo pusi Karbi Anglong ahamphang atum choningri. Bonta pini arni anta BOP kapathir thek dam longle. Thirklong angthek aphan ahoi along tovar selam pen danglok ason son chingthur asai deng dam nangji puta hang. Diphu a DC pen saimek deng dam lo bonta lahai ta paru lap lo. Arnivang si aronre pen Nagaland asor Karbi Anglong alongle nang cherai bomsi non km kethom an sose nang parlo et lo. Kachari atum kacheroktok pen kachingthur amo kedengde det ajok labangso asanchom aphan kithirklong thekdam longle det lo. Lahorijan pen Rangaphar BOP adak kesom anujok amokha anta phur lap si phalangno thei lo. Aronre pen nang kilut pen longle nang kacherai atum aphan phalangno nangji anparta isi a pillar kikim aphan lakh isi anparta damde lasi tower kim det lo pulote kejokvan nang dopo. Lasi ahoi aphuthak kamatha parsik nangji pusi pini Karbi Student’s Association, Karbi Students Union, Karbi Student’s & Youth Council, United Students Union of Karbi Anglong, All Assam Students Union Karbi Anglong District Committee, All Dimasa Students Union Karbi Anglong District Committee atum Diphu a DC aphan Mridul Kumar Mahanta aphan kapanong apinpur along hang.
Lasonsi pinpur aloh kapajir ahut DC kachechak dun alamthe kaningje ke, Independence Day talon det aphi Dimapur a DC pen nang kapachetongji aphan klempo pusi hamphang asong aphan pudun.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives