ADVERTISEMENT

This area is available for advertisement. Please contact for details.

Arnivang
Get Adobe Flash player

NRC draft list along India amonit amen kave aphuthak NRC aphansi Debarat Saikia akoi karvak

GUWAHATI, Paipai 7: Nonhetjong Jakhong 30 arni kapangdak NRC draft list along bang 40 lakh sose amonit atum amen kave dundet aphuthak Assam pen pen India adangpi arlota laso aphuthak chethansai lo. Laso draft list along ongdung India amonit atum amen ave dundet pusi kaprek-kaprek ahin pen lam kevanbom apor ahut laso along India ratpangri, Registrar General of India lapen NRC asaiphu atum aphansi Assam Assembly opposition jabang Debabrat Saikia akoi arvak. Pini Guwahati arongsopi ihum a hotel along pherangke amai pangnisi Supreme Court klardak alamrai pidet aphita 1971 aningkan pen athak penang an aprang pen India along kedo angthek kedo ongdung atum amen draft list along kave dundet abangke manghu meme pusi pherangke amai along Debabrat Saikia ningje. Alangli kaningje thuke aman kedo Supreme Court a judge bang hini atum laso aningkan There 27 arni state coordinator pen India ratpangri atum aphan 2018 Aru achiklo kechengsi arui angbong jongsi akaprek a state mate kaprek-kaprek bank, insurance company mate state adangpi kaprek-kaprek a ditrict along kangkrung kangchapji aphan ketoi ducument heihui jongsi nangchiruire pulote district court a judge abitung aphan adon-adon toisi ducument nangkele atum aphan kelang kangchap asai patang nangji lapen Aru 31 angbong laso asai patang nangji pusi kapinkhat dolo. Saikia asangho kaningje thuke Supreme Court lapuson alamrai pidet aphita NRC final draft list paklang det aphi Registrar General of India (RGI) Dr. Sailesh  akaprek a state pen penang an a ducument nangpachiruire pusi kaprek-kaprek state ratpangri aphan akoi pilo.
Pinpurme NRC state coordinator pen Supreme Court aphan kapachini atengke lakh 10 ra suri 67 ducument aloh kaprek-kaprek a state, bank, insurance company lapen nelitum a state kaprek-kaprek a district along kechok-kechokche kelangchariji aphan toi lo lapen laso angbong phant 37 anvet nangkachirui. Penang anke nangkachiruire det ajok kelangchari asai lapen kethapdun derjon lo. Laso aphuthak Debabrat Saikia kaningje ke, akaprek a state pen halahai aloh (ducument) nanglele det setame laso asai keklem patang nangji pusi Supreme Court NRC authority atum aphan kapinkhat dolo. Laso aphita kedamtang 1948, 1956, 1964 aningkan Pakistan pen India along kevang mate halaso ahut citizenship registered pen ke-en angthek aloh  dokok atum amen draft list along amen dodun nangji apotlo. Lasi laso asai along India ratpangri, RGI lapen NRC authority atumsi kechokche pusi Saikia akoi pi. State pen tiri ratpangri atum NRC ahin kedo alamtoi heihui ko-ansi kapapleng loma laso aphuthak NRC authority pen Supreme Court along pajir dam nangji puta Debabrat Saikia hang.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives