ADVERTISEMENT

This area is available for advertisement. Please contact for details.

Arnivang
Get Adobe Flash player

Kechak ke RCC adolong seta Disama arat Chomna langroi telong pensi kap nang bom lang

IMG-20180807-WA0013Diphu, Paipai 7: KAAC kaparlo No. 18 Lumbajong Constituency angkang Disama No. 2 ahavar kachelengji aphan kemesen atovar lapen Chomna aroi along RCC adolong kave ajok aningkan ningkanta rat atum kisung chechak nang lo.
Disama ahavar along kado kave rong 9 do lapen kado kave kibi-kethi pangrumpet bang 8000-9000 amonit aphai do. Anparta vote kejok aphai kedo oh ajoksi polling station ta nang bi lo. Kedamtang 1940 aningkan pen Disama ahavar along rong nang sengdet pen pini arni anta Disama arat Havarkimi an kapaleji aphan Chomna aroi athak kemesen adolong kave ajoine kisung pensi cheleng nang lo.
Ningkreng abotor ahut Disama arat atum chingrumsi chek adolong cheselamsi ningkreng esek cheleng po, barla apor ahut chek adolong ta lang pondet titi ajoine puthot kisung pensi Havarkimi an chepale nang. Disama arat chojor-cholang pen chenglok, keso ke un-eh kachepon, loh charli osomar atum school kidun anta aningkan-ningkan kisung pho nang lo. Anparta langroi kekap ahut apran kedam nang an akisung kepho ahutta dolo pusi Disama No. 2 Sikari Hanse arong asar Bidyasing Hanse pherangke atum aphan than.
Pinpurme, kilik ahut kilik kachedan dun atum vang pen, ‘Chomna aroi athak RCC adolong nangselam pipo’ pu alam aphong-aphong nang chechak tekang. Seta pini arni anta Disama arat aphan chongthui chot ason mansi dolong thek longle det lo.
Kedamtang ningkan 15 Congress kachari ahut MLA barim Bidyasing Ingleng penta kilik apor ahut vangsi RCC adolong nangselam pipo pu aphong-aphong nang chechak tekang lo, seta rat aphan kapachobaisi man detlo.
Non kedamtang KAAC MAC kilik ahut Lumbajong MAC mate EM Roton Teron ta Disama along vote kerek amai nang pangni lo. Bangso akisung theklongsi MAC kilik haidet pen ni 15 aphi lote telong nangpipo pusi nang chechak tekang. Laso ateng pensi MAC haidet pen chiklo jon 3 aphi telong ihum nang pajir lo. Telong kangpu amai along EM Roton Teron kevangji Matijong achiklo malom pen Disama arat apharman RCC adolong kikim pangcheng po pusi chechak tekang. Laso ateng alangli kachechak alam kachepaplengji aphansi Disama arat chonghong dinglo puta Sikari Hanse arong asar Bidyasing Hanse pherangke atum aphan than.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives