ADVERTISEMENT

This area is available for advertisement. Please contact for details.

Arnivang
Get Adobe Flash player

Nagaland asor Karbi Anglong arlo Km 5-6 an nang kilut

KSADiphu, Paipai 4: Lamki kedosai Nagaland pen Assam Karbi Anglong ahoi along Nagaland asor aronre Karbi Anglong arlo Km 5-6 an arlo nanglutsi kithirklong ahem, paisong, tovar heihui kacheselam bom pu abirta longsi pini KSA, KSU, KSYC, ADSU lapen AASU atum chelangsi ahoi kahumri dam.
Hamphang asong atum Lahorijan pen lutsi Nagaland ahoi Shankar Tila along pale damsi Nagaland asor aronre longle nang kepet lang dam lo. Laso ahut ahokpet Nagaland asor aronre Karbi Anglong arlo nanglutsi kithirklong ahem-arit anparta tovar pen chenglok hem a paisong kangtui thektik kachikim thek dam long lo pusi pini arnikangsam KSA asaihem along pherangke amai kangni ahut pangdak.
Nagaland lapen Karbi Anglong ahoi alamki pini penap alam kali, bonta kedamtang ningkan ko-an pen lone ta laso alamki do lo, seta Assam ratpangri atum pen laso alamki kapajutji aphan thangnat asai kedeng thek longle. Assam Nagaland ahoi along Pillar som lo seta Nagaland asor pillar heihui anta nangkapsi longle nang cherai lo. Laso aphuthak kedamtang arni katharle asai klemlo seta keklem pameme det ajoine pini arni Km 5-6 Karbi Anglong arlo Nagaland asor hem-rit nang kachikim chepangcho lo. Lasi ahoi kacheraikomji aphan ahoi along kachingthur asai Assam state ratpangri along thangnat abidi ta ave ma? Meghalaya pen Nagaland atum ahoi along kaprek-kaprek kachingthur asai nang klem seta Assam state ratpangri kaike ta ingsamrisi thek long pusi KSA ameiphu Bijoy Bey pherangke amai along jai.
Ahoi aphuthak aphong-aphong netum Assam ratpangri arideng pinpur aloh pajir lo seta ratpangri pen thangnat asai kedengta theklongle. Assam ratpangri lahai ahoi nang kepet aphuthak langchari dunsi ahoi alamki pajut nangji lapen Nagaland a ratpangri pen amethang amonit atum lapuson aronre Karbi Anglong arlo nang kilut chekhang nangji. Assam ratpangri nang lang dunding lapen Nagaland ratpangri ta chekhangkhe pulote mentuneta ahoi along monsam do thekthe lo pusi All Dimasa Student’s Union ameiphu Pabitra Nunisa jai.
Police atum kaiketa ahoi along humri mate langdam bom pusi cheparoka seta ahoi anujok konatsi kesom chinine. Lasi ahoi kapalangchari arpu kepek BOP a police atum ahoi keraikom amen Nagaland asor aphan ale kipi asaisi klem rong lo. Laso alam kejong dam nangkok athe ke ahoi kelangdamji aphan karne pon ahut police atum cheserai plot. Ahoi keraikomji aphan Assam ratpangri lapen Council ratpangri atum ahoi keraiji aphan kopisi keklem nang pachini nangji pusi KSU ameiphu George Timung arju. La-an chot kali ahoi kacheraikomji aphan khei kacheprek lapen dhorom kacheprek alam chipupe pin kado kave klem rappetsi chesong nangji puta KSU ameiphu George choningri.
Ahoi keraiji aphan Assam ratpangri pen Karbi Anglong Autonomous Council atum prapjin pen sai deng nangpo. Ajirdingklui pen lamki kedover Karbi Anglong pen Nagaland ahoi alamki pajut serak nangji pusi KSYC sankur chunbang Bipul Tisso pen kehang paso.
Pinpurme pini ahoi kachehumri dam KSA, KSU, ADSU, KSYC lapen AASU atum along kacherap dunji kali Bokajan SDPO ta Swastik Mishra aphan kenep kangnangjisi patherong puta birta long dun. Laso ajoine hamphang asong lapen Bokajan SDPO angbong lam chedan lo puta chini dun.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives