ADVERTISEMENT

This area is available for advertisement. Please contact for details.

Arnivang
Get Adobe Flash player

EKAD BJYM klembang amai kangni

IMG-20180805-WA0017DIPHU, Paipai 4: Bharatiya Jatana Yuva Morcha mate BJP asong ajakong ansose kapangtang thekji aphan lapen nangkeleji MP kilik ahut kosonsi BJP pen kachotoidun candidate atum aphan kapahai thekjima aphuthak pini Diphu Farmer Growth Centre along BJYM East Karbi Anglong District Committee klembang amai pangni. BJYM East Karbi Anglong district a meiphu Longki Rongpi kachepahemphu amai along KAAC CEM Tuliram Ronghang alohi sarpo aman pen chetong dunsi BJP akemang ke jakong (power) aphan kali rat akisung mate hamphang akisung kapajokji aphansi kemang, lasi Prime Minister Narendra Modi kedeng ason-ason a scheme heihui ilitum mesen pen keklem pachun nangpo lapen rong-rup arlo anta ponthek nang po. Jasemetpet ke ladak BJYM atum arpu do. Rong-rup arlo komane kachinine lapen kethekthe atum aphan BJYM atumsi than pare dam nangpo lapen rap dun nangpo pusi ningje. State Yuva Morcha dun meiphu Taranga Gogoi, saihem chunbang Kabita Sarma, chunbang Rupa Hojaisa, IT Cell i/c Mimo Das, KAAC EM Raju Tisso, Khonsing Rongpi lapen Amorsing Tisso, MAC Ramsing Timung, Biren Hanse pen danglok ongdung BJP jabang atum kachetong dun amai along BJP East Karbi Anglong district a meiphu lapen KAAC EM Raton Teron kejai ke Yuva Morcha pen Mohila Morcha atum chepangtang nangnji pusi ningje. Yuva pen Mohila Morcha ingtanglo pulote BJP asongta ingtangpo lapen det longri kapachingthur apharman chari longpo puta alangli ningjesi det longri apharman mesen keklem-kedam lapen ethan-ekemum along ilitum charli dun nangji. Jasemetpetke Yuva Morcha atum laso abang ning arlo chethap thot pensi sai klem nangji anparta rong-rup arlo anta sai keklem pachethang damthek nangji. Kedamtang Congress kachari ahut ta scheme kedeng heihui mesen setame lahai a scheme kapachunji aphan ajahak atum angbong kachejok dun pen keklemtap-keklemprui ajok kelongvek nangji atum longle detlo mate ledamde detlo puta EM Teron asangho ningjesi song along kacherap do-an abangphu-bangphi atumta khei longri apharman isima isi ke mesen asai keklem paklang thek nangpo pusi ningje.
Prime Minister Norendra Modi aratpangri kangni pen non an kedeng 112 scheme aphuthak lapen lahai scheme kosonsi keklem-kedam nangjima anparta kosonsi rat anglum kepon pen ale pavang thekjima heihui aphuthak BJP East Karbi Anglong District Committee dun meiphu Roland Kiling BJYM klembangphu-bangphi atum aphan than pachini.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives