ADVERTISEMENT

This area is available for advertisement. Please contact for details.

Arnivang
Get Adobe Flash player

Kevangji parliament kilik along bangphu chetoi dunji: NFNS

Ingdeng 5 JACAS keseng arni katalon

IMG-20180804-WA0005DIPHU, Paipai 3: Tiri ratpangri aphan kapakroi pen state kapalongji aphan National Federation for New States (NFNS) penta non kevangji 2019 parliamentary kilik ahut pharman bangphu chetoi dunji pusi pini JACAS ingdeng 5 mahang kethek katalon amai along jai.
Kedamtang 2013 aningkan Jakhong 31 arni pen Karbi Anglong arlo hemprek kehang amede kekar angtheksi JACAS amahang nang thek lo. Laso ateng JACAS tiri along Congress kachari ahut aphong-aphong dilung kethom chingki lapen BJP ahut ephong dilung kethom chingki lo.
Kachesong ke arnisi ni ni pen kijutkok asai kali, lasi kachesong ke-otthipji aphan ning chepaningding nangji lapen kachipidet un ajakong do nangji pusi NFNS ameiphu Aney jai. Alangli lamthe kejai ahut Gorkhaland kachesong kopi apotsi chunche det lo pu chenglok Maharastra along Vidharba atum kachesong alam heihui alam mai along pinpur.
Congress atum kachariji ajakong kacherai verji aphan akemang pensi Telengana aphan hemprek pilo. Haladak monit kithi aphai dopik apot le hemprek kali puta alangli jai.
2014 aningkan BJP atum kachari ajakong kelonglok ke ilitum ason-son song so atum pen kacheto dun ajoine chot puta alangli jai.
Karbi Anglong kelongvek nangji autonomous state kelongle det aphuthakta NFNS ameiphu S. Aney jai. State ke bang atum ke nang palong pipe lo, methangsi chepalong nangpo. Lasi ning isi kedo kenangsot puta alangli.
“Kedamtang MP kilik aphong Bodo pen Karbi atum kechokche ke amethang amonit aphan chetoi dundesi BJP pen kachetoi dun abangphu aphansi pahai rong. BJP jakong kelong ke nangtum a vote ajoine chot, Congress atumta nangtum a vote ajoine chot. BJP-Congress aphan pahai lo, seta nangtum ke haihe det lo. Nangtum thurplut pen chesongse tik ke lapen nang ajakong aphan kachari along kedo atum nang pherere tik ke nangtum akemang chun un-eh puta jai.
Tovar along thurpak pen kachesong ke epran kachingmoi lapen kachesong kapajut asai chot lo. Athe tovar along thurpak pen kachesong lote police ahile amu cho nangpo kali police arideng pen ereng so nangpo. Laso ajoinesi Gorkhaland hemprek kehang kachesong chunche det lo.
Lasi ilitum aphan non kevangji 2019 kilik ke isi kenangsot apor binong lo, athe laso ahutsi ilitum kachesong ajakong chepaklang longpo pu heihui alamthe alangli jai. Nanglitum jongsi jakong longle pulote nanglitum akemang ke chunche puta alangli jai.
All Bodo Students Union (ABSU) ameiphu Promod Boro kejai ke, BJP atum state aphuthak kachechak alamthe ajoine state kehang asong atum kacherap dun ajoksi kachari ajakong long lo. Det adang kachari a ratchari asong atum ratchari ale aphan state aphuthak ningjesi ale chepalong. Lasi ilitum jongsi state nangji pulote lahai atum aphan paremvek nangpo puta alangli jai.
KAAC CEM Tuliram Ronghang aning arlo kopisi kamatha lone chinine det lo seta alangli hemprek kehang along nang kachekroi dun alam anke ningje, seta netum a Hangrama ke nang kekhamkhe dunlok puta jai.
BJP atum kachingthur asai klem lo, seta kachechak ateng rat akar-i ason kapapleng piji alam ke thangta ningje letle puta Boro ningje.
Mai along kachetong dun NDFB (Progressive) sankur chunbang Govindo Basumatary, Karbi atum autonomous state kachehang penang ajirding lo, seta pini arni anta chunche seta sangkok nangne chesong bom lote longvekji pusi jai. Laso kachesong along nelitum NFNS penta nang cherap dunpo puta lamthe chepi tekang.
Mai along kachetong dun Manipur Kukiland kehang atum T. Gante; Rakesh, Anil Kumar, KLNLF dun meiphu Habe Tokbi atum pen hemprek kehang kachesong atum ning isi dothek nangji. Jongsi dothekthe pulote kachesong pangtang un-eh lapen hemprek kehang chunche. Lasi hemprek kehang kapachunji aphan ning isi do nangji lapen kachari aratchari pen kachesong arat atum isipet do nangne pu heihui alamthe jai tekang.
Hemprek apharman karjap thip JACAS ahamphang along KSU kachelang dun.
Chairman Khorsing Teron kachepahemphu JACAS ingdeng 5 mahang kethek katalon amai pajut det aphi NFNS atum pen pherangke amai pangni. Pherangke amai along non kevangji 2019 Parliament kilik along National Federation for New States penta pharman bangphu chetoi dunpo. Ahavar tin along kedo NFNS member asong atum kachekroi alingsi chetoi dunpo. Kaprek aratchari alongle cherap dunji mate kaprek asai klemji seta havar along kedo NFNS klembang asong atumsi lang pen klempo.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives