ADVERTISEMENT

This area is available for advertisement. Please contact for details.

Arnivang
Get Adobe Flash player

Disama No. 2 Irrigation scheme ningkan isi angbong ingten plin

IrrigationDiphu, Paipai 3: Karbi Anglong Autonomous Council (KAAC) atum sai chotiki arat atum aphan kedor plup alang kelongji aphan pura Karbi Anglong Irrigation asaikam pen AIBP 2013-14 pen kuti-kuti atangka dengsi kaprek-kaprek adim along Irrigation scheme pangni lo. Sonsi Lumbajong constituency angkang Disama No. 2 Irrigation Scheme (IS) (PH-II) asaimo dengsi patang lo. Laso ateng pensi kedamtang 2016 aningkan Paipai niphai 4 arnisi bangso scheme KAAC CEM Tuliram Ronghang arideng pen ingpu dam. Seta bangso Irrigation alangteng kethe ihi anat lang kekhangji aphan keteng adim along non malom arve alom sovet kejang alang anta kekhang un-eh det ajok kedamtang Paipai niphai isi aningve ingten plin lo. Non malom sok ke-eh ketong kachingkhan chit apor ahutsi bangso alangteng ingten dun plin amat haladak arat sok cho-eh longle reklo. Bangso ajoine haladak arat ning ke-oi lapen kaningri alam pherangke abitung kahumri dam ahut birta rip long.
Disama Irrigation Scheme dolo pu-pen Disama angkang kedo Sikari Hanse, Sarmen Hanse lapen Sarthe Inghi arong arat atum kedamtang 2016 aningkan ingpu det aphi 2017 aningkan ke apor ateng pen sai chotiki longlo. Pining lethot setame apor ateng pen sai kachotiki kapatang dunji aphan keklem bom kedambom apor ahutsi kedamtang Paipai niphai isi ajo jirlo apor bangso alangteng kangten plin ajoine hidi ajo anta lang kreng etlo. Jongsi non malom arve ave pulote pining aningkan ke sok cho-eh dun longlelo. Lasi sai kachotiki aporchit apor ahut Irrigation asaikam atum pen tongsekot pen bangso kangtenplin IS kaselamji aphan choningri lo pusi Sikari Hanse arong asar Bidyasing Hanse pherangke angno than.
Kedamtang apor ahut Irrigation asaikam pen sai nang kachelang bom ahut langteng kangten plinji angring thetan do, lasi boulder pitching along alan (net) den nangji lapen retaininig wall pangtuisi longle kethok setame pangtui nangji pu rong arat atum aphong-aphong jong dunlo. Anparta bangso asaimo (Scheme) kangpu ahut KAAC CEM Tuliram Ronghang kevang ahut ta rong arat pen pachini dunlo. Bangso ahut CEM ta kechokche kelele do anta SDO atum pensi lang chari po pulo. Seta non abangke asai keklem asai ke-oi ajoinesi ingpu det pen ingkan isi aphi lang pon plin lo puta rong asar Bidyasing Hanse jai thu.
Non BJP ratpangri ke porivorton asorkar pulo, setame non abangke kachingthur asai keklem asai ke-oisi ke-ongdung adim athek long. Non Disama saimo along ta lapusonsi cheman lo. Lasi kiduk det kachotiki arat atum aphan kapanongpi Disama IS paprjin pen kaselamji aphan KAAC CEM Tuliram Ronghang cheparidengsi bangso Irrigation asaikam selam nangpo pusi pherangke abitung atum kahumri dam ahut KATSSA meiphu Semson Ingti jai dun.

Leave a Reply

Your email address will not be published. Required fields are marked *

August 2018
M T W T F S S
« Jul    
 12345
6789101112
13141516171819
20212223242526
2728293031  
Archives