ADVERTISEMENT

This area is available for advertisement. Please contact for details.

Arnivang
Get Adobe Flash player

NRC final draft list along don 39 angtan amonit amen kethap

GUWAHATI, Paipai 2: Foreign tribunal alamhoi tangdet aphi Marigaon along kapangthek tang angtan asor ahemtun atum aphan NRC draft list along amen kedo ajoine hur chodut lo. Lapu-an kelang kapangching mate avarsai dengdet aphita kosonsi don 39 angtan asor atum amen NRC along kedo kok lo pusi hadak arat atum charju seroi lo lapen laso aphuthak langtarlip pameka nangji pusi hadak arat atum hang. Don 39 ahemtun atum aloh heihui kechokche ajoinesi foreign tribunal pen angtan asor pusi pangdaklo setame NRC along latum aphan amen kethap pondet ke manghu meme puta hadak arat atum ningje rinti.
Don 39 ahemtun angbong Marigaon district foreign tribunal pen angtan asor pu kapangdak, lamhoi kedobom lapen honthe meme voter list along amen kedo ahemtun atum do. Halahai ahemtun atum aloh (document) heihui kelang tarlip ahut kechokche angthek klanglo pusi chini dun. Halahai ahemtun atum NRC final draft list along amen klangkle pusi Marigaon district deputy commissioner Hemen Das klardak pen kaningje dolo.
Marigaon district Lahorighat pen danglok kaprek-kaprek adim don 39 foreign tribunal 2011 aningkan aphi penang an hearing padodet aphi Marigaon district along don 39 atum aphan angtan asor pusi pangthek lo. Setame NRC final draft list along alanglitum aphan amen kethap pon-et ajok kado kave atum aphanta pamanghu prong lo. Don 39 ahemtun atum adon-arap atum amenta NRC along amen dotahai pusi rat atum honthe.
Angtan asor atum aphan karplung amen pen ningkan trok Assam kachesong kopi aphansi kapado nangkok lo pusi rat atum arju. Assam kachesong ahut ongdung abangphu-bangphi atum apran chipi nanglo. Laso pen ajok Assam Accord chetoksi penang an aningkan aphi Supreme Court kapatirpi pen NRC atovar riplo. Setame NRC aphuthak Assamese arat atum akemang mate kamunthi ason plengple detlo. NRC aphuthak Supreme Court pen apor pen apor Assam ratpangri aphan kapaso-ang ajoinesi la-anta kichun chtlo kali pulote ningkan pharo ta NRC chunche det tahai lo mene pusi rat munthi. Kedamtang 2017 aningkan Matijong 31 arni kechengsi angkung NRC draft list pangdaklo lapen puthot final draft list ke 2018 Jakhong 30 arni pangdak lo. Laso along don 39 angtan asor atum amen klang dun lo. Assam kaboche barim arat atum ning kachethe atengke laso NRC pensi Assam along kedo angtan asor atum aphan pangthek longpo lapen arplung unpo pulo setame ko-ansi ahokpet mate kangthimlim pensi laso NRC asai keklem ma laso aphuthak anutinta kaningje pangcheng bomlo. NRC asai keklem along kaparlo ongdung saiphu-saikhi atum methang arpu kacheklem pamekake det ajoinesi lapuson alamki klang nanglo puta rat akoi pisi NRC draft list along angtan asor amen ko-ansi kilut loma lapen ko-ansi angtan asor atum ladak amonit kachemanji aphan kabor-i ma laso aphuthak katarlip kenangsot pusi rat kehang.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives