ADVERTISEMENT

This area is available for advertisement. Please contact for details.

Arnivang
Get Adobe Flash player

Elwin Teron, Jayanta Chetia, B.K Mishra atum aphan drafting committee along pon longle: Hamphang song 24+

Elwin TeronDiphu, Paipai 2: Council kilik aphan rule pen act kaselamji Karbi Anglong Autonomous Council pen drafting committee selam lo, seta sixth schedule aron ateng kali, HC pen kachini anparta sixth schedule aron ateng pulote council atumsi selam nangji lapen kaselam atumta inglong aso atum vek nangji pusi Diphu Irrigation IB along pherangke amai kangni ahut hamphang asong 24 abidisar J.I Kathar IAS (Retd) pangdak.
KAAC Standing Counsel Advocate Jayanta Chetia pen Advocate B.K Mishra atum ke inglong aso kali. Lasi latum aphan kepon ke council kilik aron kaselamji aphan a drafting committee keseng pen amatsi sixth schedule aron karkan ason man det lo. Laso aron kaselam ke sixth schedule ateng vek nangji. Lasi alanglitum bang hini aphan drafting committee along keponji puke chekroi dunde.
Elwin Teron aphanta drafting committee along kepon chedon dunde athe alangli ke sixth schedule aron kachinine abang lo. Pinpurme, kedamtang netum kachesong kecheng ahut alangli longta bidi-sore ke-en damji aphan pale lo, seta halaso ahut alangli kaningje ke sixth schedule constitution ke ningkan 10 aphan anvet lapen sixth schedule ke thangta ale ave pusi nang ningje dun lo. Lasi lason abangphu aphan drafting committee along kepon chekroi dunde puta pherangke amai along pangdak.
Lahai atum kedamtang arni sixth schedule kapachunji aphan kekhamkhe abangphu atum lo. Lasi non apor alanglitumsi sixth schedule ateng council kilik aron kaselamji puke netum chekroi dun thekthe puta jai.
HC pen nang kapale aloh along lapen sixth schedule ateng council pensi Para 2 sub para 7 ateng council kilik aron kaselamji aphan council amonit vek nangji, seta Baithalangso a MLA Dr. Mansing Rongpi alangli ke council amonit kalidet. Lasi alangliphan drafting committee a chairman pek un-eh, alangliphan klembang (member) kepon kechokche ave seta chairman pek un-eh. Drafting committee a chairman ke council amonit vek nangji, lasi non kedobom KAAC chairman kalite deputy chairman atum angbong pensi inut aphan laso a drafting committee a chairman pek nangji puta hamphang asong 24 atum hang.
Rat nang kacheto dun ateng nelitum hamphang asong 24 atum kachesong lapen High Court along PIL kipi ajoinesi ningkan 65 aphi council kilik aphan rule pen act kacheselamji aphan apor keme longlo, lasi netum hamphang 24 asong angbong pen kado kave bang 15 atum aphan drafting committee along klembang (member) nangpon vek nangji puta hamphang asong 24 atum kehang paso.
Sixth schedule kaparlo inglong a district along non lapuson apor keme kelong ahut netum ajatta kachechok (mistake) kedo netum chechak un-eh. Athe laso apor keme jongsi chepangbo det pulote kevangji arni Karbi akhei mate sixth schedule alongri arlo kedo inglong aso akhei atum ke bang kangnek choi athenglong cheplang det po. Lasi laso aron kaselam along netum thangnat angkrak kibiji ning hanghe, athe aron kaselam ahut kechokche pen konatne angkrak dokok pulote kevangji arni inglong aso kali det mate schedule tribe kalidet atum puthot nang kachejok dunji aphan avarsai dokokji puta hamphang asong 24 a bidisar J.I Kathar IAS (retd) pherangke amai along pangdak.
Drafting committee kaselam ta sixth schedule aron ateng vek nangji, lasi para 2 pen para 7 ateng council kilik aron kaselam ahut para 20 ateng nangji puta pherangke amai along pangdak.
Kedamtang ningkan 65 angbong Karbi Anglong kachari atum kaphere lapen sixth schedule aron kachinine det ajoine ilitum aphan constitution along isi a det kacheselamji aphan mini constitution nang bipikok ta klemthekthe det lo. Lasi non aporta sixth schedule aron kachinine ajoine sixth schedule kapachun aphan kekroikre atumsi aron kaselam puke kamatha meme alam binong. Lasi laso aron kaselam thangta kechokche kave detji aphan netum aphan drafting committee along klembangphu nang pon vek nangji.
Jongsi kehang ateng bang kethom Elwin Teron, Jayanta Chetia lapen B.K Mishra aphan drafting committee pen hekhe, netum aphan klembangphu nang ponpe pulote democratic aron ateng pen sodak kachesong asai deng puta pherangke pen pachetak.
Pinpurme, Hamphang 24 atum kachesong lapen Guwahati High Court along PIL 9/2017 kipi ajoinesi pini apor High Court pen lapuson council kilik aron kacheselamji aphan chiklo jon trok apor council aphan pilo. Laso ateng council kilik aron kaselamji aphan KAAC pen drafting committee selam lo, drafting committee along 20 Baithalangso MLA Dr. Mansing Rongpi aphan chairman, KAAC MoS a OSD Elwin Teron aphan drafter, KAAC Legislative a Deputy secretary Birsing Ingti aphan member secretary lapen KAAC chairman barim Dharamsing Teron, Prof. Rongbong Terang, Jayashree Daulagupu, IAS (Retd.) DGC political science a HoD Prof. J.D Thang, DGC Prof. Bernard Rongphar, KAAC arpu kache-oh tang joint secretary Dhaneswar Ingti, arpu kjut tang joint secretary Rupsing Tisso, KAAC standing counsel Guwahati HC advocate Jayanta Chetia, Guwahati HC advocate Mindar Rongpi, Guwahati senior advocate B.K Mishra atum aphan member pon lo.
Pini Irrigation IB along pherangke amai kangni ahut Hamphang asong 24 a convenor Ratan Terang, convenor Rajesh Tisso, Convenor Angtong Ingti Kathar, Convenor Dhonsing Ronghang lapen kaprek-kaprek klembangphu-phi atum chetong dun.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives