ADVERTISEMENT

This area is available for advertisement. Please contact for details.

Arnivang
Get Adobe Flash player

KAAC Forest asaikam along aronre pensi chokamar anghoi pekbom

APSC asonthot tarlip pameka pulote klardak angthek klangvekji

DIPHU, Paipai 1: Karbi Anglong Autonomous Council (KAAC) along non amatke saikam (department) thongkep do, setame laso angbong Forest asaikam along henlo aronre asai keklem nai. Chokamar anghoi kepek pen danglok sai amo keklem nangji do-an setame sankur arat aphan thangnat pachinine pin pensi joi-joi pen keklem kachonghu lok. Kedamtang arni pen Karbi Anglong ador keso thengpi-thengprang pen danglok arlong, sangti, koila lapen ason-ason Karbi Anglong akhi-adat Forest asaikam along lamki klangnai lo. Lake kado-kave arat atumta thekprong lo. Lason thakthaksi kedamtang Congress chari ahut pen non BJP a ratpangri ahut anta chokamar anghoi kepek ahin sankur arat aphan pachinine pinlang. Aron-et ke chokamar anghoi aphan rat thekprong inghoi kejoi (Vacant post) paklangsi interview hang nangji. Laso aron akaprek a saikam alongke klembom lo lapen thek dun longbom lo, setame Forest asaikam along abang ke pini arni anta lason aron keklem thekdun longle lang. Forest asaikam along lapuson aronre asai keklem ajoine bang hini abangphu atum 2005 aningkan Right To Information Act. (RTI) aron ateng pen PCCF asaihem along RTI aloh jokdam lo. RTI aloh along jasemet petke kedamtang 2010 aningkan pen 2017 aningkan apharman grade III pen grade-IV anghoi bang ko-an aphansi kipilo lapen laso kipi angthek mate inghoi kejoi (vacant post) aphan advertisement kapaklang dolo ma? Jongsi paklang pulote konat nat avarsai pensi kapaklang lo, anparta KAAC along OSD asai kopilo pu heihui alam angthek (report)
kelongji aphan hanglo. Laso RTI aloh kejok ke kedamtang 2018 Thangthang achiklo niphai 13 arni henlo. Setame pini chiklo jon pho plengdet aphi ta arpu kedo atum laso angthek pithekthe detlo. Lasi ladak pen langdam pulote Forest asaikam along chokomar anghoi kepek ahin aron damde pin lo. Jongsi aron pen klem asonte RTI pen kehang abangphu atum aphanta lahai angthek pithek etji apot lo. Setame nonke RTI kejokdun abangphu atum aphan saihem along batai-batai kapahelat ansi pado khang janglo.
Forest asaikam along lapuson chokamar anghoi kepek ahin aronre keklem ajoine mate joi-joi pen keklem ajoinesi chokamar anghoi kelong atumsi long varetlo lapen kelongle atumke longle lethot lo. OSD kepek pen KAAC along kopi asaisi keklem loma laso angthek thek dun longle. Chokamar anghoi aphan tong tangka kaparung varet loma mate chokamar atum along tangka kaparungji aphantong OSD kepek loma ke isi arjume alam asonlo.
CEM Tuliram Ronghang mai-thai along contract asai pen danglok chokamar anghoi kepek along tangka sika isi ta pa-en longle pusi ningje bom lo. Setame Forest asaikam along vacant post hehui paklangkle pin pen joi –joi chokamar anghoi kepek varet abangke tangka pensi chokamar anghoi kejor lok loma pusi matha dam meme asonlo.
Vacant post paklangkle pin pen lapen aron padamde pin pen lapu amat chokamar anghoi kepek varet abangke mo nonphi akisung vangve detji puke pudam un-eh. Athe non kado kave atumta thek long pronglo tangka ajakong pen APSC along ACS, IPS kenam atum chingnang bom lo. Lasi ladak Forest asaikam alongta APSC along asonthot tarlip pameka pulote klardak angthek klangvekji.

Leave a Reply

Your email address will not be published. Required fields are marked *

BREAKING NEWS
August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives