ADVERTISEMENT

This area is available for advertisement. Please contact for details.

Arnivang
Get Adobe Flash player

NRC final draft list kapangdak, Assam adangpi bang 40,07,707 atum amen klangkle det

Bang 2 MLA amen klang dunde det

GUWAHATI, Jakhong 30: Assam sankur arat ajir kidinglen kachesong lapen khei apharman apran kachipi bang 855 anokbe atum aphan ardi pisi Supreme Court kapatirpi dun pen anparta tiri pen state ratpangri atum kacherap-kacheto dun NRC asai keklem kijut angdeng an nangle lo. Assam arat aphan kevangji arni isi phurkimo keraikom arisim labangso NRC kangthimlim lapen ahokpet India amonit atum amen ansi dochot nangji pu Assam along kedo anuttin abangphu-bangphi atumta mang thip lo. Laso atengsi kedamtang arni NRC draft list paklang det aphi pini puthot final draft list pangdak lo. Pini porphai 10 pen online avarsai pen kapangdak final draft list along Assam adangpi pangrumpet bang 44,07,707 atum amen klang dunde detlo.  Todap porphai kep apor Guwahati along kedo state cordinator asaihem alongsi Pratik Hajela ingpulo. Online pen pangdak det aphi 3 crore 29 lakh amonit atum amen kejokdun NRC draft list along bang 2,89,83,677 atum amen klangdun lo lapen bang 40,07,707 atum amen ke klang dunde detlo. Seta isi kamanghu meme alam abangke final draft list along Abhayapuri AIUDF MLA Ananda Kumar Malos pen Marigaon BJP a MLA Ramakanta Deuri atum amen klang dunde detlo. MLA Deuri amen klang dunde det ajoine Marigaon atalom hur chodutlo lapen MLA Deuri amethangta ning ingsamse chepaklangsi puthot choningri damdelo pusi pachini.
Pini NRC draft list kapangdak aphuthak adap porphai 10:10 apor NRC state cordinator Pratik Hazela, Register general of India SS Sailesh lapen union home secretary North-East i/c Satyendra Garg atum pherangke amai pangnisi NRC draft list pangdak lo. Laso aphuthak pen kopene soluk-sodak dokok pusetame kapangsam dunji aphan administration atum chisik dinglo. Home ministry non amat ke Assam chief minister, chief secretary lapen DGP atum pen Delhi arongsopi along mai ingni tanglo. Laso amai along NRC draft list pangdak det aphi kedoji meme soluk-sodak atemon kapahamji aphan matha parsiklo. State along lakh sose Bangla alam kaningje Muslim pen Hindu atum draft list along amen klangdunde lo pusi kamatha kisung dolo setame laso angbong home ministry pen laso aphuthak monit hijan kachinghon angbong lang pangchingsi Assam ratpangri aphan akaprek avarsai kedengji aphan pinkhat lo.
NRC final draft list along amen keklang dunde lapen D voter atum ahokpet aloh (document) pen puthot choningri longji pusi NRC administration pen state ratpangri atum pachini lo. Amen kave det atum mate amen kechokche padet-padat atum dokok pulote Chiti 28 arni an methang-methang NRC centre along choningri dam longji. Pini NRC final draft list pangdak det aphi methang-methang amen mate don-rap jirpo-jirpi atum amen kachelang longji aphan setame website pen SMS avarsai thopilo, lake www.nrcassam.nic, www.assam.mygov.in, www.assam.govt.in, www.homeandpolitical.assam.gov.in along lang longpo. Kevangji Paipai 7 arni adap porphai 8 pen state adangpi kedo-an NRC centre along draft list a coppy dopo. 2500 centre along laso a copy dopo.
Pinpurme, laso NRC asai kedeng along Assam adangpi bang suri 55 ratpangri achokamar atum klemdunsi pini final draft list kapangdak thek aphuthak Assam adangpi arat hirjume lapen kurvangthu pajir.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives