ADVERTISEMENT

This area is available for advertisement. Please contact for details.

Arnivang
Get Adobe Flash player

Assam arat aphan kevangji arni cheraikom aphurkimo asimbon lo: CM Sonowal

NRC

GUWAHATI, Jakhong 30: Aman kedo Supreme Court alamtoi lapen RGI keklemdun kapasik mate tiri pen state ratpangri atum kacherap kacheto dun ajoine penap NRC draft list pangdak lopo.  Laso arni lake ilitum kado kave aphan isi phurkimo arni asonsi dopo. Laso NRC kapachunji aphan kacherap dun bang 55,000 govt. achokomar  lapen Barak, Brahmaputra, inglong thoi kedo Assam arat aphan Assam Chief Minister Sarbananda Sonowal kurvangthu pajir. Laso NRC pen thedung Assam along kedo sankur arat atum kevangji arni isi keraikom dopo pusi ning thelo anparta NRC pen ajok ahokpet India amonit atum ning kachethe ahin pen atovar jokvanpo pusi ning thelo. NRC kado kave asai along Assam arat atum kachesong aphurkimo ta kacherap do puta Chief Minister Sonowal ningjesi ningkan trok Assam chesong det aphi ale kelong Assam Accord along Assam aphan constitution aphan keraikom ajakong lapen isi angtan asor kapave mate NRC kapachingthur asai kacerap dolo. Kedamtang 2016 aningkan BJP pajirpo aratpangri ajakong vangdet aphi NRC asai kapachungji aphan Aru 25 arni NRC asaihem along pale damlo. Isi kangthimlim NRC kaselamji aphan tiri pen state ratpangri atum kecheng ahut pensi cherap cheto dunlo. Prime Minister Narendra Modi lapen home minister Rajnath Singh atum ahokpet India amonit atum amen parlosi kangthimlim NRC kapangdak thekji aphansi ardi pilo. Tiri ratpangri atum laso apharman kenangsot tangka heihui kerap dun pen danglok home minister Rajnath Singh pen laso aphuthak nelitum pen kachingvai abatai do ohlo. NRC kapachunji aphan ajat apor ahut ta tiri ratpangri atum ardi nangpi dunlo puta Chief Minister tiri ratpangri aphan kachoro. Chief Minister Sonowal kaningje thuke, NRC kechengsi angkung draft list paklang det aphi Barak-Brahmaputra . inglon-thoi , khei-dhorom atum ingsamjin pen ning isi kedo chepaklanglo lasi pini non kapaklangji NRC draft list pangdak det aphita halaso monsam ning isi kedo pathirkluk po pusi ning thelo. Lake isi draft list chot lasi NRC along komane atum amen ave det pusetame matha chepasung nangne. Ahokpet India abangphu mate bangphi atum pulote aron ateng pen choningri longji. Laso along tiri pen state ratpangri atumta kadokave asai angdeng along kacherap dunji aphan chisik lo. Halapu home minister kapangdak ateng pulote NRC along amen kave atum Detention Camp along dam nangne pusi pangdak lo. NRC lake national asai angdeng lasi laso asai kapachunji aphanke ahokpet India amonit atum arpu do. NRC amen pen maduta kehoi-kemai alam kapave detji aphan nelitum batai batai kachoningri dolo. Setame hamphang along ajahak otlangno atum NRC amen pen pachethangtap-pachethangpruisi khei angbong kapacharvoji aphan kabor-i dolo. Lasi lapuson asai langno kapavirji aphan ilitum chingri pet pen arjap nangpo pusi Chief Minister Sonowal chonigrisi India kejokvan ningkan 70 aphi kaselam NRC draft list pensi Assam along abangphu phi tin akai arjon aphan keraikom dopo pusi ning chethe.

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives