ADVERTISEMENT

This area is available for advertisement. Please contact for details.

Arnivang
Get Adobe Flash player

Ni 20 apharman kechengsi Karbi kan barim aseke kapajut

IMG_20180721_165115DIPHU, Jakhong 21: Cultural Affairs asaikam pen Karbi Traditional Music, Culture & Research Institute atum patirpisi Lorulangso Rangsina Sarpo Cultural Hall along ni ingkoi apharman kechengsi ‘Summer Camp Free Training cum Workshop on Karbi Folk dance’ aseke kipi kapajut amai pangni.
KAAC EM Rupsing Teron chepahemphu amai along alohi sarpo aman pen KAAC EM Ratan Teron chetong dun. Anparta KAAC EM barim Bidyasing Rongpi, KAAC joint secy barim Dhaneswar Ingti, TCRO Rani Terangpi, Hemphu Mukrang Adorbar ameiphu Lunse Timung, tokbang Joysing Tokbi, deputy director Hemari Tokbi atum alohi aman pen chetong dun.
Ni ingkoi apharman kedamtang Jakhong isi arni pen Karbi kan barim aseke kipi asai pangchengsi pini seke kipi pajut lo. Bangso seke kipi asai along ningkan 6 arta pen 13 angbong atum aphansi kangvai lapen kado kave bang 130 a-osomar atum men chethap dunsi nimso kirung, ritnong chingdi, hacha kekan pen chenglok kaprek-kaprek Karbi kan barim heihui aphuthak seke en dun lo. Pratap Ingleng, Dilip Kathar, Kangbura Tokbi, Junaki Teronpi lapen Anjali Timungpi atum pensi seke kipi pilo. Ni ingkoi angbong seke kipi along Best Discipline anong-e Sarkiri Senar pen Arnamika Tokbipi atumsu long lo.
Osomar atum aphan loh kethan chot kali kapathu, lun-kan pen kaprek-kaprek heihui setame than nangji, keplang kiphi a-osomar atum aphan ason-ason ning kaparung lapen kapacharli anatthu ardi kipi lapen anparta osomar atum aphan degree angdeng pa-un det aphisi api-apo atum methang asomar atum aphan kapajui varsai pi nangji. Seta Karbi atum ingdeng pho-trok angdeng pen amatsi api-apo atum kapajui avarsai tho det, laso ajoine ajahak arta kijum pensi piso-some en lo lapen kethek kave ajoine akisung pen chetong lo. Lasi, methang akhei pulote kechengsi methang ajutang-jubat, lun-kan, nim-rokom chepangcho nangpo, non kithurmi a-ove atum aphan ardi pi nangji pusi KAAC EM Ratan Teron jai. Alangli kejai thuke, KAAC arta ningkan 67 arta pleng etlo, seta pini Karbi Anglong angkan keduk det keboi det atumsi ke-ong lang. Karbi atum work-culture kave apot lo, laso ajoinesi Karbi atum doctor, engineer kacharli atum aphai batbe det lo.
Arta kedo atum methang alun-kan heihui ta chetene bom lo, lasi non a-ove atum aphansi jasemet KAAC pen ardi pipo lapen kevangji arni Karbi lun barim aseke kipiji aphan chesik chedang bom lo pusi mai kachepahemphu alamthe KAAC EM Rupsing Teron jai.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives