ADVERTISEMENT

This area is available for advertisement. Please contact for details.

Arnivang
Get Adobe Flash player

KSA kachethakjam ajok ingdeng 59 katalon along kapale dunji aphan manghu mangram

DGC along ingdeng 59 KSA mahang kethek arni alir-alon pen ketalon

DIPHU, Jakhong 21: Kt. Langtuk Phangcho chikimo arani pamansi pini Diphu Goverment College along ingdeng 59 Karbi Students Association (KSA) mahang kethek arni alir-alon pen talon dun.
Jaimek ateng pini porphai isi apor song alama KSA ameiphu Semion Rongphar arideng ingthur. Laso aphi armu chejengsi KAAC CEM Tuliram Ronghang arideng ’51 point demand charter’ aphuthak pinpur aloh pajir dam. Laso aphi rat amaipi ingni.
KSA ameiphu Semion Rongphar kachepahemphu amai along sankur chunbang Thomson Rongpi mai kepha alamthe jai. Bangso amai along MP barim Dr. Jayanta Rongpi alohi sarpo aman pen chetong dun. Anparta man-peng alohi aman pen EM barim Rabi Kr. Phangcho, HSDC ameiphu Dr. Mongve Rongpi, KSA dun meiphu barim Selawor Bey, HSDC chunbang Laichan Ingleng, KNCA chunbang Pratima Inghipi, Dima Hasao DWS ameiphi Rengmila Hojai, Kuki National Assembly ameiphu Tauthang, KYDO ameiphu Kiran Tokbi, HYPA ameiphu Enjoy Tisso, UKYA ameiphu Varlongki Dera atum pen chenglok SYJ, SYC, RYA, KAWJF atum chetong dun.
Karbi akhei akisung non apor ahut angbong alongsi do. Central pen state ratpangri atum Karbi akhei aphan aphong-aphong nang chongthui bom lo. Lasonsi sixth schedule ajakong pabop bomlo lapen kethek-kere akhei atum aphansi nonke sixth schedule arlo kaparloji atovar anatsi dam bomlo, anchot ta kali Karbi Anglong ahoi alongle kaprek kaprek akhei atum nangparloji aphan bor-i bomlo. Anparta Karbi ariso-nimso BA, MA ketang tang atum do-oh lo, seta pini chokamar kepalongji aphan CEM, EM, minister atum aphan lakh-lakh atangka pajir nangji pulote kiduk det arat atum konat pensi la-an atangka kelongpo? Sonsi contract along ta EM, CEM atum adon-arap pen akaprek ke majok ta longle pusi pini ingdeng 59 KSA mahang kethek katalon amai along MP barim Dr. Jayanta Rongpi jai.
1986 aningkan pen nelitum kachesong ajoksi pini MoU central ratpangri atum pen chetoksi 30 asaikam van lo, sika 30 crore alar sika 1000 crore atangka KAAC arideng nangle bom lo, neliphan CEM, MP kikhibom ahut thangnat asai keklemkle pusi ajahak ratchari asong akoi nang arvak, tangte 2002 pen pini arni an KAAC along kachari Congress lapen non BJP CEM, EM atum Karbi akhei aphan kopi lo kevan pi pusi Dr. J. Rongpi arju. Neli CEM arpu kangni bom ahut BDO pen Engineer appointment kipi tekang pen pini alanglitum Guwahati chedam nangne lapen nonpu ta methang adim alongsi dobom lo, seta non KAAC kachari atum LP thanbang anghoi anta kipiji aphan ajakong ave puta alangli jai.
KSA pulote khei kisung ahut keraikomji aphan chesong hai nangji mate phere repin pen kachesong lapen paprang hai nangji, lasi non kithurmi a-ove atum henlo Karbi Anglong pen Dima Hasao arat akar-i Art. 244 (A) kapachun thekji atum lo. Lasi non khei kisung apor ahut kachingrum pen kachesong nangji apor lo puta Dr. Rongpi jai.
Kedamtang kilik ahut BJP election manifesto along kapaklang Karbi arat akemang art. 244 (A) pachunji pusi pachetak lo lapen non killik haidet aphita amethang atumsi hemprek hang bom, seta halapu BJP central ratpangri ke hemprek pithekthe pusi pangdak lo. Rat aphan kapamanghu ajoine hemprek amen pen KANCHASDCOM atum aphan Delhi rongsopi along chesong alamkan paklang lo. Jongsi BJP ratpangri hemprek nangpiji vek pulote Delhi, Dispur lapen KAAC along anta BJP atumsi ingni lo pusi HSDC chunbang Laichan Ingleng jai. Jongsi hemprek apharman akemang do pulote CEM, EM atum methang arpu pen sun haijima puta Laichan Ingleng arju.
Bangso amai along kachetong dun kaprek-kaprek alohi atum pen khei kisung pen chenglok methang kacharaikom nangji aphuthak ason-son bidi-sore pi dun.
59 angdeng KSA ahamphang keseng arni kacheto dunji aphan ke-ongdung atum kapale dunji aphan chini ne detsi kaprek adim kapale nangji kaprek adim le rong lo.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives