ADVERTISEMENT

This area is available for advertisement. Please contact for details.

Arnivang
Get Adobe Flash player

Hamren, Howraghat alongta ingdeng 59 KSA kaparjap arni talon dun

HAMREN, Howraghat Jakhong 21: Pini ingdeng 59 Karbi Students’ Association (KSA) kaparjap arni Hamren arongsopi alongta Hamren Regional Committee atum talon dun. Hamren Rongchingdon pathu aklam along katalon amai along KSA Hamren Regional Committee kaparlo do-an aro-arim atum chetong dun.
KSA, HRC ameiphu Probin Timung kachepahemphu rat amaipi kapangni ahut sankur chunbang Babul Tokbi mai kepha alamthe jai. Laso ahut alohi sarpo aman pen Ronghang Rongbong (Rong-Arak) pen Karbi Richo Ramsing Ronghang, Katharbura Rupsing Kathar, Senot Robising Rongphar, Meji Kiri Ingleng, Lindok Seng Rongpi, Pherangke Samsing Hanse, West Karbi Anglong DC Debajyoti Hazarika, MAC barim Chandra Rongpi, KSA tiri Bidisar Philip Taro, KSA rap chunbang Thangsing Timung pen danglok kaprek-kaprek hamphang asong jabang atum chetong dun.
Mai along West Karbi Anglong district Hamren rongsopi avaikang NEC atovar, RCC adolong kaheno, rihing ameh kachothor ahok kave pen danglok ason-ason akisung aphuthak KSA jong dunsi pinpur aloh DC arideng pajir.
Halapu HSLC asatlang ki-un dun abangphu-bangphi lapen kachesong ahut areng keso abangphu-bangphi atum aphan nong-e pajir.
KSA ke khei amoi arbung pu kehang pen arpu the-o, lasi kado kave ta ardi pidun nangji pusi mai along Karbi Richo Ramsing Ronghang ningje.
Lason thak thaksi Howraghat Higher Secondary School pathu aklam alongta ingdeng 59 KSA kaparjap arni talon dun. Semson Teron kachepahemphu rat amaipi kangni along All Assam Students Union (AASU) bidisar Dr. Samujal Bhatacharjee, Moran Students Union (MSU) ameiphu Arunjoyti Moran, Naga Students Federation (NSF) Amonbo Jiliyank, AJYCP pen Uday Gogoi, KSA meiphu barim Robindra Rongpi lapen Chomang, Garo loh charli ahamphang jabang atum alohi aman pen chetong dun.
DEN ARONG, DOKMOKA: KSA Howraghat Regional Committee pen Dokmoka Longkam Teron auditorium hall along KSA keseng arta 59 angdeng kepleng alir-alon pen talon. Jaimek ateng KSA Howraghat Regional Committee ameiphu Rustom Bey song alama pachepur. Lasonsi karlitang atum aphan chunbang Sotrosing Teron chikimo amelur kekai jalin lo. Song keseng arni ason-son jaimek deng det aphi arnarlo porphai 12 apor pen rat amaipi pangni. KSA Howraghat Regional Committee ameiphu Rustom Bey chepahemphu arat amaipi along KSA meiphu barim Bidya Teron alohi sarpo aman peng pen chetong dun anparta chopha alohi aman pen KSA tiri dun meiphu Budha Terang, Dokmoka KLA aro ameiphu Borsing Kro, Karbi Rong Asar ameiphu Rupen Hanse lapen rong asar Prokash Rongphar atumta chetong dun.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives