ADVERTISEMENT

This area is available for advertisement. Please contact for details.

Arnivang
Get Adobe Flash player

GST aphi toll gate kangpu, aso a gari sika 150, gari kethe atum 500 atangka pinang po

Sankur arat aphan aduk kanghoi

GUWAHATI, Jakhong 13: Jakhong 12 arni pen Raha along kapangni toll gate ingpu tang lo. State adangpi ongdung tovar akrong gari-motor cheleng nopin setame ratpangri pen rat along medu ke-en avarsai klemtang lo. Kadure arat avi kachongsip toll gate Assam aphan ko-antong kisung kephoji lone laso abang mathathe pin pen state lapen tiri ratpangri atum toll gate kapangni ahukum pidet lo. Ningkan isi angbong chiklo jon trok lang kanglum pen kisung kepho nang arat atum pini arni anta chepachong aboha along kedonang arat atum kosonsi highway aphan tangka kipi po? Lake isi matha meme alam binong. Tovarpi kacheleng abatai tin medu kipi nang pulote kaprek-kaprek ahin beha klembang atum kisung chechak nang po. Beha klembang atum halahai atangka sankur arat pen ke-en nang ajok hormu ador ta pabat nangkok titilo. Kachini dun atengke ephong damput pulote akeng hong pli a gari atum ke sika 150 lapen hurmu karthang a gari truck lapem bus ke sika 500 an tangka pinang po. National Highway patang pamekake pen Raha along toll gate ingpu detlo lapen toll gate kangpu longle detji aphan hamphang asong atum chesong lo setame laso kachesong kroikre detsi ratpangri pen ingpu det lo. Non amat ke KMSS atum vi chipidet setame labangso a toll gate pangpu longle pusi chesong thip lo. Setame ratpangri atum aprang penta toll gate ingpusi rat pen kosonsi medu kirung longjima aphansi bor-j bom lo. Kedamtang 2015 aningkan ason hamphang asong atum erset prungset kachesong pado kok tahai. Assam arlon tovar akrong heihui keme oh-eh apor ahut paribartan alam kaningje aratpangri atum toll gate ingpusi tangka kirung abangke therak meme pusi ongdung cheroktok arat atum ningje. GST aron kedeng pen rat aphan aphi puthot toll gate kangpu pen sankur arat aphan pachehothang anpo puta rat atum ningje.
Pinpurme Assam ratpangri pen angthek longsi toll gate kapangniji aphan National Highway Authority chisik lo pusi kedamtang 2017 aningkan Pre 23 arni National Highway Authority North-East manager Raj Chakroborty ningje lo. National Highway along 60-70 km adak dak toll gate kapangniji aphan National Highway Authority of India atum chisik lo. Toll gate pangnine det ajoinesi state along chingthur thekthe detlo pusi mananger Chokroborty ningje. Halapu Lower Assam Chirang district along Dhalapara NH-31 along kapangni toll gate kedamtang 2015 aningkan Aru achiklo niphai 17 arni ongdung amonit atum me kaidut lo. Laso ahut computer hum 25 lapen 35 CC TV phalangno lo. Halaso ahut Akhil Gogoi pen toll gate aphuthak penang an chesong lo. Non ephong state along BJP aratpangri kevang pen puthot toll gate kapangpuji aphan kachisik aphuthak ning kasngsamse paklang lo. Jong damde upper Assam pen lower Assam an kolo a national highway ketang pameka dolo. Tovar holik kedo-at ajoine gari-motor vek un-eh pin lo. Laso aprang Chirang district adunghet lapen Nagaon Raha along toll gate pangni lo setame KMSS atum pen ongdung hamphang asong atum kachesong kapaso ajoine sai jokje inghap nangkok lo.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives