ADVERTISEMENT

This area is available for advertisement. Please contact for details.

Arnivang
Get Adobe Flash player

VC aphan terek nangji pu kachesong atum areng keso

IMPHAL, Jakhong 18: Manipur University vice-chancellor Adya Prasad Pandey asai cheklem pameme pu akoi vansi VC aphan terek nangji pu Durmi arni Kangla fort along kachesong atum aphan police ketheng. VC terek nangji pu kachesong ahut bang troksi doji police arideng pen areng keso dolo.
Democratic Students’ Alliance of Manipur (Desam) klembang atum Kangla fort athengno human resource development minister Prakash Javadekar, Manipur chief minister N. Biren Singh lapen Pandey amephi kaisi kachesong pangtang.
Desam kong chunbang Shital Oinam ari arvi anat kelok pen hospital kedo nang ajok Urmi arni ta Desam asong khamkhe.
Kekhamkhe asai kedeng abitung atum chief minister a bungalow along kachesong dam ahutta police atum kethang pen areng keso do. Aphi ajehak atum aphan ke police kenep ta dolo.
Manipur alongri loh kacharli anat temon kaheno litpik anlo, lasi laso alam aphuthak state government pen sai deng pame nangji pusi Desam meiphu Salam Akash jai. Ning ingsamchit alamchak HRD ministry pen nangpipe tik ke chesong bom ji pusi ningje. Manipur University Students’ Union atum ghonta 48 kangkir kepha along netum ta chedon dun lo pusi than.
Pandey abe kedo in-charge registrar M. Shyamkesho lapen deputy registrar R.K. Jotin atum aphan rat ajakong kapaklang nangji apor lo. Lahai alam aphuthak kachingki damji pu ahut pen latum kachepatu lok. Loh kacharli lapen thanbang atum aning kehang ateng central government sai dengde pulote ansose kachesong angtang pithu nangkok po pusi Akash ningje.
Loh kacharli atum rongsopi arlo kekhamkhe ahut halapu Imphal East lapen Thoubal alongri arlo along kaprek-kaprek asanchom alongta kachesong along kachedon dun atum kekhamkhe dun asai dengbom lo.
Aru 30 arni penlo Pandey aphan VC anghoi pen terek nangpji pu Desam kachesong. Vosik 6 arni university kanghap penlo kachesong angtang kapaso. Thanbang lapen university along kam keklem dun atum anta loh kacharli atum kachesong along chedon dun.
Biren Singh jalinsi Manipur BJP delegation atum Urmi arni Delhi Kimi along Javadekar aphan chetong dam lapen  Manipur University alam aphuthak than pachini dam lapen university community atum kangthur alam aphuthak kelang tarlip dunji aphan  inquiry committee pangni nangji pusi chiningri.
Laso alam aphuthak katarlipji a committee ke retired high court judge aphansi pajalin nangji pusi pu.
Pandey pen kapangdakde rek satlang angthek ta prapjin penpangdak nangpo pusi loh kacharli atum kehang.
Durmi arni an university community atum choche-junje kachesong ni serlep lo. loh kacharli atum kekhamkhe along thanbang lapen Manipur Institute of Management Studies, history lapen sociology departments along kam keklem atum anta  cheto dun.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives