ADVERTISEMENT

This area is available for advertisement. Please contact for details.

Arnivang
Get Adobe Flash player

Inter-Church Football tournament angdung kiti

Den Arong, Jakhong 18: Upper Dokmoka Etpo Taro arong pathu aklam along Community Health and Development BCH, a unit of Emmanual Hospital Association atum pen East Karbi Anglong inter-church football tournament cum addiction & human trafficking aphuthak kapadobom asai pini pajut lo.
Pini kikutsi arni football kapathuta angdung kiti pathu lo. Pini kijutsi angdung kiti kapathu amai along NKBA executive secy. barim Rev. Lawrence Ingti, NBKA Youth Department ameiphu Obet Killing, Diphu Baptist Church pen Amos Ronghang, UDBC a pastor Ananda Tokbi,  UDBC pastor barim J. Hanse, Union Christian English School a principal Moses Hanse, evangilist Kagimon Chetry, Govin Raj Sharma atum pen chenglok kaprek-kaprek man kedo abangphu atum chetong dun. Angdung kiti amai along Sarhon Hanse alohi kapachini apor en. Pathu chengche aprang-prang Etpo Taro a Mondoli atum pen Karbi kanbarim lapen Sunday school a osomar atum pen langmesen akekan paklang lo. Anparta bangso apirthe along pap kihupthip ajok penang amonit atum kaprek-kaprek raki ahormu kecho anparta pap beisa keklem pensi aning arong chipi lo, amethang a ok aphan ke ahotur lo puke chematha damde det ajok arta kijum pen apran kedam nang. Lasi un-an pen non kithurmi a ove atum kachere dun akenangsot pu heihui alam alohi atum than pajirmi tekang.
Believer Church lapen Molajan FC angbongsi angdung kiti football kapathu chedan lo. Arnikangsam porphai 4 apor pen pangcheng det aphi kechengsi angkung kapathu minute 25 kechok ahut Believer Church FC pathu bangphu Binong Kro goal isi thap lo. Laso aphi minute 35 kechok ahut lethotta alangli puthot goal isi thapthusi ingkung isi kapathu kangton ahut an Believer Church FC atum hini goal pen hai bom lo.
Adunthu angkung kapathu ahut Molajan FC atum kachiting krup ajok minute 30 kechok ahut penalty longsi Probhat Rongpi goal isi thap lo. Bangso aphi hin-hin aterank atum goal chethap thekthe det ajok kapathu kapajut an Believer FC atum 2-1 a gaol pen Molajan FC atum aphan parem lo.
Kedamtang Jakhong 9 arni pen pathu along kado kave terank 18 atum chepate dun. Laso angbong pathu kelangmenei anong eh Dhoniram Kro aphan nong-eh pajir, goal kethap ke-ongnai Probhat Rongpi atum chepalong lo.
Angdung kiti kehai Believer Church aphan kechengsi anong-eh, adunthu anong-eh Molajan FC lapen ingdeng kethom anong-eh Roman Catholic Church atumsi cheparideng lo. Birson Kramsa, Roton Ingti, Sar-im Teron lapen Elvis Tokbi atum pensi pathu ingsai dun lo.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives