ADVERTISEMENT

This area is available for advertisement. Please contact for details.

Arnivang
Get Adobe Flash player

Bhomkuru arni anarlo 12 aphi pen lote aprang ason Diphu hithi kulat ingpu-et nangji: A. Kramsa

Diphu, Jakhong 12: Karbi Anglong Chamber of Commerce (KACC) asaihem Diphu ahithi along pen chetereksi pini 11:30 apor Amlapatty adung kedo CEM Bunglow athengno alongsi KACC asaihem kimi thirthip ingpu lo pusi KACC chairman Augustine Kramsa pherangke angno ningje.
Diphu ahithi along KACC asaihem kepangni anam mate achiklo jonvangsi saihem anam pi nang ajoksi pini Amlapatty along KACC asaihem methang adim kethirthip pensi pangni lo. Lasi badu beha-bepar klembang pen chenglok rat atum kopene kachini lapen karjuji alam do pulote bangso asaihem alongle nang humri non puta Kramsa asangho jai. Bangso saihem kimi kangpu amai along Kramsa asangho kejai thu ke Diphu ahithi Bhomkuru (Sunday) arni hithi-kulat ingkir kling titi ajoine jasemet akehelo pen kevang arat atum akisung pen kachetong nang do lapen anparta komane gari-motor adang kaheno ason kaselamji aphan setame akisung chetong nang. Lasi aprang ateng anarlo porphai 12 apor aphi pen lote hithi kangpu etji aphansi choningri lo puta alangli jai.
Diphu ahithi Bhomkuru arni ingkir kling titi ajoine prapjin pen hithi ingpu nangji pu KACC pen kedamtang There 22 arni KAAC CEM Tuliram Ronghang arideng pinpur aloh pajir dam lo. Sonsi Aru achiklo 18 arni DC arideng setame pinpur aloh pajir dam lapen anparta Town & Country Planning asaikam atum aphan setame There achiklo 14 arni pinpur aloh pajir dam lo. Seta pini arni anta thangnat asai ta dengde. Laso ateng langdam pulote alanglitumsi ahukum kipi ma pusi Kramsa asangho arju. Diphu ahithi arlo arlong abeha keklem atum bazaar committee amen en pensi rat aphan CFT isi arlong along sika 65 adim sika 90 anam ke-en abangke chokche lapen komat ahukum lo puta alangli arju athe Manja, Longnit quarry along CFT isi arlong alongsi sika 65 vet pensi jor bom, jongsi pabatji chetji pulote sika 75 baksi anam en chot nangji apotlo. Lasi, laso aphuthak KAAC pen Forest atum tarlip nangji puta alangli hang.
Diphu ahithi arlo Bhomkuru arni loh-han pen chenglok kecho ahormu kevan ahut atruck aphan committee amen en dun pen sika suri kep, suri krepho atangka ke-en dun-dun ajoine pini loh-han ador bat nang lo, laso ajoksi loh-han kachonam arat atum akisung pen chetong lo puta saihem kimi kangpu amai along KACC chairman Augustine Kramsa jai.

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives