ADVERTISEMENT

This area is available for advertisement. Please contact for details.

Arnivang
Get Adobe Flash player

West Karbi Anglong alongle Meghalaya asor nang kacheparoka

HAD minister pen CEM aphan than pachini det aphi CM Sonowal along lam lesi adai en po pusi chechak: EM Pradeep Rongpi

IMG-20180710-WA0016DIPHU, Jakhong 10: West Karbi Anglong district kaparlo Chinthong MAC constituency arlo kedo Sabuda pu arong Meghalaya ahoi kedei arong along Habang Range Officer, Umjakini Range atum ‘Welcome to West Karbi Anglong District’ pu ketar atarpangthek pini porphai 11:30 apor malom Meghalaya asor kangsek lapen chor tekang lapsi ‘Sabuda Raid Nongtung Ri-Bhoi District Meghalaya’ pusi tarpangthek chetar tekang kok lo.
Pinpurme, kedamtang Jakhong niphai 4 arnisi labangso atarpangthek Range Office, Umjakini Range, Habang atum tarlo setame Meghalaya asor phalangnosi amethang alongri atarpangthek ketar tekang ke Karbi Anglong alongle nangkithi binong lo athe halaso atarpangthek ketar adim ke West Karbi Anglong alongri Chinthong MAC Constituency binong. Lake methang Karbi Anglong alongle vek lo, bonta Meghalaya asor atum Karbi Anglong arlo nang lut choksi lapuson asai nang keklem det ke Karbi Anglong Autonomous Council aphan nang kelang plot binong lo.
Karbi Anglong pen Meghalaya adui-ahoi alongle alamki keklang ke lam kimi kalilo. Kedamtang ko-an ma ahoi alamki ke Karbi Anglong pen keklang ongdung birta aloh malom ta pachethang bom lo lapen KAAC kachari atum aphan ta aphong-aphong kelang chari dunji aphan ta choningri lo. Setame KAAC kachari jabang atum thangnat ardi kipipe det ajoksi pini lason akisung pho nang lo pusi ahoi arat ningje. Range Officer, Umjakini Range, Habang atum pen ‘Karbi Anglong Autonomous Council, Welcome to West Karbi Anglong District’ pu a tarpangthek ta Meghalaya asor nang pridaksi Ri-Bhoi District Meghalaya pu nang kibi kok ke Karbi Anglong arat atum aphan kemesen angthek kali lo. La-an chot kali mo kevangji lang arni ke Meghalaya Ri-Bhoi district atum la-an sose arlo nang kilut pen methang Karbi Anglong arat atumsi kisung chetong nangji. Lasi prapjin pen Karbi Anglong Autonomous Council kachari jabang atum adim along an humri dam pen methang Karbi Anglong alongle kacheraikomji aphan keton kelang asai kapadoji aphanta keklem kenangsot binong puta ahoi arat aning kiduk pen ningje.
Halapu Karbi Anglong arlo kedo hamphang asong atumta ahoi along humri damsi methang Karbi Anglong alongle mate ahoi alongle kosonsi kacheraikom dun thekji ma laso aphuthak isi bak asai kedeng kenangsot, seta social media lapen local newspaper along kapangdak chot ke asai vangve. Hamphang asong pen KAAC kachari atum chelang pet pen sai deng lote Karbi Anglong ahoi along pini ason ke Ri-Bhoi district Meghalaya asor atum ta lapuson asai nang klem hai he detji apotlo pusi rat atum ningje.
Meghalaya asor Karbi Anglong alongle nang cheparoka aphuthak CEM pen HAD minister aphan than pachini lo lapen laso alam CM Sarbananda Sonowal along anta lesi Hamren SP pen DC aphan pinkhat si kechokche aphuthak sai deng nangpo pusi CM pu pusi EM Pradeep Rongpi ningje. Anparta tongsekot pen Jakhong 10 aningve Hamren SP adim humri dam lo.

Leave a Reply

Your email address will not be published. Required fields are marked *

July 2018
M T W T F S S
« Jun    
 1
2345678
9101112131415
16171819202122
23242526272829
3031  
Archives