ADVERTISEMENT

This area is available for advertisement. Please contact for details.

Arnivang
Get Adobe Flash player

IAY ahemso ketangte aphuthak Langsomepi block pen KATSSA asong angbong kachingvai

DIPHU, Jakhong 10: Kedukdet arat atum aphan ratpangri pen kepanongpi kedamtang 2012 pen 2017 aningkan angbong IAY ahemso ketangte kedo an patang et nangji pu Karbi Anglong Territorial Social Security Association (KATSSA) asong ke-otthip ajoine pini Langsomepi Development Block atum pen mai kangni.
Bangso amai along kopi apotsi apor ateng ketangte det ma lapen komasi adai kedo mate kechokche ma pu aphuthak pangtheksi mai along jong. IAY kelongvek nangji atum kachethan atengke angbong nang kachejok dun (middleman) atum henlo nelitum account pen tangka ke en. Batai kethom kelong nangji atangka bank along endet aphita ahemso tangte detlo pusi chethan. Angbong kachejok dun atum lake Harsing Ronghang, Sarthe Teron, Lorence Teron, Sankar Terang, Monoj Teron, Welson Ingti, Deep Tisso, Mohendra Basumatary, Horen Terang, Alon Teron, Sonjoy Terang atum henlo puta block asor athengno beneficiaries atum akoi pi. Mai along beneficieries account amen pen kosonsi angbong kachejok dun atum bank along pen tangka ke-en longma puta block asor pen hamphang asong angbong chingvai angbip charchak rinti lo. Lasi, bank asor bangso IAY ahemso atangka ke-en along kacherap dun do lapen pangtheksi ingsai nangji puta chethan. Lasi ahok pet alam kelongji aphan angbong kachejok dun atum aphan pha si alam patini nangkok po,  kachingvaiji aphan kevangji niphai 19 arnisi pathik lo. Jongsi angbong kachejok atum bangso arni vangve det pulote sodak asai deng nangkok po puta Langsomepi dev. Block officer Kanaklota Teronpi jai.
Pinpurme, Kedamtang arni Lumbajong Development Block atum penta IAY ahemso ketangte det aphuthak mai ingni lo. Laso ahut hum 587 IAY ahemso chiklo ejon angbong patang etpo pusi Lumbajong block asor lamchak chipi lo. Lasi, Langsomepi block kaparlo ketangte ahemso kedo an patang et nangji kali pulote lamhoi pinangkok lapen bangso kachesong along IAY ahemso kapanong atum cherap cheto dunji aphansi choningri lo lapen long 11 block alongta humri damsi ketangte ahemso kepatang etji aphan pasoji puta KATSSA ameiphu Semson Ingti jai.
Mai along Langsomepi Dev. block BDO Kanaklota Teronpi,  JE Arun Thousen,  AE Numol Narzary, Jivan Bordoloi, GS Chandra Ronghang, Joising Ingti, Dondeswar Teron, Upen Basumatary, senior GS sawna Swargiary pen chenglok beneficiaries atum chetong dun.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives