ADVERTISEMENT

This area is available for advertisement. Please contact for details.

Arnivang
Get Adobe Flash player

Non anta 1st half atangka sika isi ta longle lang: CEM Ronghang

231 KAAC Session ingnisi CAG a report kapangdak

IMG-20180706-WA0003DIPHU, Jakhong 6: Pini KAAC Deputy Speaker Ritesh Inghi chepahemphusi ingdeng 231 KAAC Session pangni. Adap porphai kep pen kapangcheng a Session along karlitang EM barim Ramsing Ingti aphan minute isi chikimosi CEM Tuliram Ronghang pen danglok EM lapen MAC atum karlitang EM barim Ramsing Ingti akai alamo aphuthak than pajirmi rinti. Laso aphi House Committee pen kaselam Comptroller and Auditor General (CAG) a report CEM Tuliram Ronghang paklang (Place) lo.
KAAC report along eson-son ni kapakeng nangji aphuthak CAG House Committee chairman D Uphing Maslai kapangdak ke Office of Memorandum (OM) ateng pen 1st half atangka Jangmi achiklo angbongsi KAAC along nangpale nangji. Lason thak thaksi 2nd half atangka abang ta Pre, Phaikuni achiklo angbongsi nangpale nangji, bonta lason kali detlo. There 31 anta ajahak asaikam along tangka kelele do, lasi apor ateng pen lahai atangka kelele det ajok akisung do. KAAC Forest asaikam pen sika 6 lakh atangka medu kelong nangji dolang lapen Assam ratpangri Transport saikam pen sika 19.35 crore atangka KAAC atum medu kelong nangji dolang. Lasi lahai kado kave akisung aphuthak EM atum methang-methang saikam asaiphu atum aphan than pare nang po anparta saihem along lahai record heihui rim pameka pulote eprang kevangji arni lahai akisung ave det po pusi ningje.
CEM Tuliram Ronghang Session ahongjai along kaningje ke, kedamtang ASDC kachari ahut Central pen State ratpangri atum pen kachetok Office Memorandum (OM) ateng pensi KAAC methang ajakong lapen aron ateng pensi chehang bom lo. Laso atengsi ratpangri pen plan allocation kelong nangji 1st half atangka chiklo jon thom plengdet aphi ta KAAC ke sika isi ta deng longle lang pusi CEM Ronghang paklang. Aron et ke laso atangka Jangmi achiklo angbongsi long nangji apotlo setame non anta longle detlo. Pini Team Karbi Anglong pen kado kave asai kapachingthurji aphansi ning hang lo. Laso atengsi rat atumta nangcherap nangcheto dunlo lapen hirjume nangpajir lo setame apor ateng pen lahai atangka nangpalele det pulote kachingthur asai kedeng alongta katora dokok po. 2018-19 aningkan apharman scheme dengsi Karbi Anglong 26 constituency along kopi-pi asaisi keklem jima anta chingvai-chingsaisi planning board along deng lo lapen tender ta hang lo. Aron ateng pen KAAC kelong nangji saikam pli, Excise, Transport, Sales tax lapen Information & Publicity asaikam non anta nangpajirje lang puta CEM Tulirang Ronghang ningjesi lahai kado kave akisung kapajokji aphan prapjin pen Assam chief minister, finance minister lapen HAD minister atum along kachingvai damji aphan Deputy Speaker aphan CEM Ronghang choningri.
Session jutdet aphi pherangke atum pen chepathengno karju ahut CEM Tuliram Ronghang kaningje ke, pini Session along kapangdak a CAG report Governor along anta pale po. Governor pen jongsi approval nangpi lo pulote choklo pusi matha po. Halapu 1st half kelong nangji atangka non anta kelongle rek lapen kachelong nangji saikam pli kelongle rek aphuthak KAAC CEM Tuliram Ronghang ningjesi Assam chief minister, finance minister atum pen chingki-chethan pen lahai akisung pajok un po pusi ning thelo. Karbi Anglong arat akar-i hemprek aphuthak non KAAC, DHAC chelangpet Delhi arongsopi along pasik damthu po puta CEM Tuliram Ronghang ningje.

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives