ADVERTISEMENT

This area is available for advertisement. Please contact for details.

Arnivang
Get Adobe Flash player

Kt. Ramsing Ingti aphan meh a an pi et lo

IMG-20180705-WA0022Diphu, Jakhong 5: Diabetes pen kidney akeso kacholonglok ajok kedamtang penang arni pen KAAC EM barim Ramsing Ingti Dimapur Zion Hospital along seh chelang lo. Seta keso kememe det ajok Jakhong 3 arni arong chevoi jui lo. Pini kithitang arpum Diphu pajuisi meh an pi lo.
Alangli kedamtang Vosik chiklo niphai 28 arni pen Dimapur Zion Hospital along seh kachelang ni pho an seh aphi atumi Jakhong 3 arni kado kave aphan che-oh tekangsi sangtet cho-en damjui lo.
Karbi aron ateng atumi arnisi rong pado det aphi pini ni thom kechok arni alangliphan aron ateng meh a an pi lo.
Pinpurme, kedamtang 1951 aningkan Arkoi isi arni Nagaon district Kuthiatoli Rongphar arong along Kt. Bhulai Ingti pen Kt. Kajok Timungpi atum ahemtun alongsi Kt. Ramsing Ingti pirthe hache lo. Kothiatoli LP School along pensi loh kacharli dun pangchengsi kethom angdeng an un lo. Laso aphi high school ke alangli Kathalguri High School alongsi charli dun seta kep angdeng asatlang ke alangli Nomoi High School pensi un lo. Kacharli aning kehangpik ajoine alangli Diphu along night college pensi pre university angdeng un lo.
1970 aningkan Agriculture asaikam Cotton Development alongsi chokamar anghoi klem dun lo. Laso aphi 1975 aningkan Nagaon district oh tekangsi Karbi Anglong Bokolia Hatipura along nang chetereksi kedo pathir lo. Laso aphi ratchari along kilut dunji mate kilik kachedan dunji aphan pusi kedamtang 1983 aningkan Matijong achiklo chokamar anghoi pen che-oh lo. Laso aphi 1984 aningkan ratchari asong aphan chikikesi Langpher Constituency along amethang jongjung (Independent) pen kilik chedan dun lo. Kilik haisi alangli Karbi Anglong District Council along Revenue pen Taxation a EM arpu deng dun lo. Laso aphi ASDC atum kachari ajakong kelong ajok alangli puthot 2001 aningkansi MAC kilik hai thu lo. 2001 aningkan MAC kilik alangli Lumbajong Constituency along Indian National Congress asong pensi chedan dun pen hai lo. Laso ahut alangliphan Agriculture pen Town & Country Planning a EM pek lo.
Laso aphi 2005 aningkan MLA kilik along ta chedan dun lang seta kilik hai un-eh det lo.
Ratchari lapen hamphang asai keklem aning kehangpik ajoine Hatipura arong along tirim kangduk asai keklem alanglisi pangcheng tekang lo. La-an chot kali Hatipura along MAC barim Kt. Habe Bey aphan kachikimo asaita alangli pangcheng tekang lo. Diphu Lorulangso ahithi along Durga puja karcho asaita alanglisi pangcheng tekang lo.
Ratchari lapen hamphang pen kacherap aning kehangpik ajoine non arong kachevoi ahut anta along Diphu Cotton Ginning and Others Crop Co-orperative Society Ltd. a chairman kikhi bom ahutsi asangtet jut lo.
Alangli inut rat asai keklem abangphu pinak ajoine MAC Horen Sing Bey pen chenglok kedamtang MAC kilik along karjap dun abangphu Phuding Terang lapen laprek-kaprek ardi kedo klong abangphu-phi atum alangliphan atumi kapadusi chepadi dun.
Pini arong thon dunde aprang KAAC EM Jagatsing Ingti pen chenglok kaprek-kaprek ardi kedo abangphu atum pen Kt. Ramsing Ingti aphan chepadi dam. Laso aphi todap porphai 9 apor pen alangliphan Diphu angkang pajuisi thiri pale lo. Laso ahut council pen chenglok alangli sai keklem adim heihui alongta anta pajui dam lo.
Meh an kipi asai along asomar lapen alanglitum pen chenglok ongdung adon-arap anparta jirpi-jirpo atum alangliphan chepadi dun rinti.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives