ADVERTISEMENT

This area is available for advertisement. Please contact for details.

Arnivang
Get Adobe Flash player

Boro atum aphan dilung kethom kachingki asonsi netum aphanta nanghang nangji: HSDC, KSA

HSDCDIPHU, Jakhong 5: BJP kachari state, tiri ratpangri lapen Boro akhei atum angbong non malom dilung kethom kachingki do bom lo. Laso kachingki along thangnat kipu ning ke-oi dun ave seta ning ke-oi alam ke non aphong ta tiri ratpangri atum Assam along kedo hini inglong a district Karbi Anglong pen Dima Hasao aphan puthot chongthui lilo.
Karbi Anglong pen Dima Hasao aphan nonta puthot keberthip asai klemsi India a constitution along ketokdak Article 244(A) dokok aphita kapachunji aphan thangnat klemkle seta kaprek-kaprek akhei atum kehang ateng state pachun pibom. Non aphong ta Karbi pen Dimasa atum aphan ke kachingki along hanghesi Boro akhei atum aphan hang lo. Non BJP atum pen Boro akhei atum aphan kachingki aphan hang lo seta Assam arlo kedo hini inglong a district mate constitution kithik pitang kibikok Karbi pen Dimasa atum aphan aphi bithukoksi thek long pusi pherangke amai along HSDC ameiphu Dr. Mongve Rongpi jai.
Tiri pen Assam ratpangri atum aphong-aphong Artice 244 (A) kapachunji aphan chechak seta pini arni anta eson pen eson alamthe paklangsi pachunche det lo. BJP ratchari atum lapuson ingvai soi-soi asai keklem apot ningduk chepaklang lapen HSDC pen kachelang rappet asong do-an atum aphanta state apharman dilung kethom kachingki aphan nanghang nangji pusi HSDC sankur chunbang Laichan Ingleng jai.
Jongsi kehang ateng article 244(A) pachunche lapen kachingki aphan anta nanghanghe pulote democratic aron ateng pen sodak kachesong asai dengji puta HSDC sankur chunbang Laichan Ingleng jai.
Pherangke amai along kachetong dun KSA ameiphu Semion Rongphar kejai ke, BJP tiri ameiphu ameiphu Rajnath Singh, Asssam CM Sarbananda Sonowal, minister Dr. Himanta Biswa Sharma atum pen aphong-aphong Article 244(A) kapachunji aphan lamchak pilo, seta non dilung kethom kachingki ahut ke Karbi pen Dimasa akhei atum aphan ke pangjok kok lilo. Lapuson angthek keklang ke BJP ratchari asong atum ki-un lapen kethek apot pusi Semion Rongphar jong.  Lapuson jongsi Article 244(A) pachunche bom pulote aron ateng pen sodak kachesong asai dengpo puta alangli jai.
Article 244(A) pachun nangji pusi ningkan 30 sose chesong lo lapen nonputa kachesong ingtontesi kedamtang Aru 17 arnita pinpur aloh pajir dam lo. Lason thakthak hemprek apharman aphong-aphong chesong bom lo puta Laichan Ingleng jai.
Republic Day, Independence Day katalon ahut pen chenglok amai tin along Karbi Anglong Autonomous Council a CEM Tuliram Ronghang Article 244(A) autonomous state aphuthak ningje. Lasi non Boro atum aphan Article 3 aphuthak dilung kachingki atum aphan kehang ahut Karbi Anglong pen Dima Hasao atum aphan kapanung kok aphuthak CEM Tuliram Ronghang pisi puji? BJP kachari state pen tiri ratpangri atum nang keklem apot alangli song pen che-oh haijima puta pherangke amai along Laichan Ingleng arju.
BJP election manifesto along klardak pen kejong pondo seta Karbi Anglong pen kehai BJP MLA atum Assam along BJP kachari ningkan hini pardet aphita hemprek aphuthak lamthe isi kaningje dun arju longle lang. La-an chot Karbi Anglong BJP ajabang atum penta non kaprek atum aphan state apharman kachingkiji aphan dilung kethom kachingki kehang ahut Karbi Anglong pen Dima Hasao atum aphan kapangjok tekang kok aphuthak kopisi pu dunji? Lason ahut Karbi Anglong BJP ajabang atum amethang asong ajabang kethek atum athengno state alam ningje dam haijima puta arju.
State aning kehang lapen state apharman karjap asong do-an atum ning isi kedo pen kachesongji aphan HSDC atum choningri. La-an chot kali state, tiri lapen ladak kedo BJP a ratchari atum state amen pen ratchari keklemkle detji lapen aron ateng Article 244(A) pachun serak nangji pusi pherangke amai pen HSDC asongja Dr. Mongve Rongpi, sankur chunbang Laichan Ingleng lapen KSA ameiphu Semion Rongphar anparta sankur chunbang Thomson Rongpi atum choningri.

Leave a Reply

Your email address will not be published. Required fields are marked *

July 2018
M T W T F S S
« Jun    
 1
2345678
9101112131415
16171819202122
23242526272829
3031  
Archives