ADVERTISEMENT

This area is available for advertisement. Please contact for details.

Arnivang
Get Adobe Flash player

Kt. Ramsing Ingti aphan penap meh a an pipo

ramsing EMDiphu, Jakhong 4: Diebetes lapen kidney akeso kacholonglok ajok kedamtang penang arni pen EM barim Ramsing Ingti penap Jakhong 5 arni meh an pipo. 

Alangli kedamtang penang arni pen Diebetes lapen kidney akeso kacholonglok ajok kedamtang Vosik chiklo niphai 28 arni pen Dimapur Zion Hospital along seh chelang dam lo. Nipho an seh chelang det aphi atumi Jakhong 3 arni kado kave aphan che-oh tekangsi sangtet cho-en damjui lo. Karbi aron ateng pini arnisi rong pado det aphi penap nithom kechok arni alangli phan aron ateng meh a an pipo. 

Pinpurme, Kedamtang 1951 aningkan Arkoi isi arni Nagaon District Kuthiatuli Rongphar arong along kt. Bhulai Ingti pen kt. Kajok Timungpi atum ahemtun alongsi kt. Ramsing Ingti pirthe hache lo, Kothiatuli LP school along pensi loh kacharli dun pangchengsi kethom angdeng an cheap-un lo. 

Laso aphi, high school ke alangli Kathalguri high alongsi charli dun seta kep angdeng asatlang ke alangli Nomoi High school pensi cheap-un lo. Kacharli aning kehangpik ajoine alangli Diphu Night College pensi Higher Secondary angdeng chepa-un lo. 1970 aningkan Agriculture asaikam Cotton Development alongsi chokomar anghoi chepalong pen klem dun lo. Laso aphi 1975 aningkan Nagaon District oh tekangsi Karbi Anglong Bokolia Hatipura along nang chetereksi kedo pathir lo.  Laso aphi ratchari along kilut dunji mate kilik kachedan dunji aphan pusi kedamtang 1983 aningkan Matijong achiklo chokomar anghoi pen che-oh lo.  Laso aphi 1984 aningkan ratchari asong aphan chikikesi Langpher Constituency along amethang jongjung (independent) pen kilik chedan dun lo. Kilik chepahaisi alangli Karbi Anglong District Council along Revenue lapen Taxation a EM arpu deng dun lo. Laso aphi ASDC atum kachari ajakong kelong ajoine alangli puthot 2001 aningkansi MAC kilik chepahai thu lo. 2001 aningkan MAC kilik alangli Lumbajong Constituency along Indian National Congress asong ahin pen kilik chedan dunsi chepahai pen Agriculture lapen Town & Country Planning a EM chepaman lo. Laso aphi 2005 aningkan MLA kilik alongta chedan dun lang seta MLA kilik alangli chepahai un-eh det lo. 

Ratchari lapen hamphang asai keklem aning kehangpik ajoine Hatipura arong along tirim kangduk asai keklem alangli pangcheng tekang lo. La-an chot kali Hatipura along MAC barim Kt. Habe Bey aphan kachikimo asaita alangli pangcheng tekang lo. La-an chot kali Lorulangso ahithi along Durga puja karcho asaita alanglisi pacheng tekang lo. Ratchari lapen hamphang pen kacherap aning kehangpik ajoine non arong kachevoi ahut anta along Diphu Cotton Ginning and Other Crop Co-orperative Society Ltd. a chairman kikhi bom ahut asangtet jut lo. 

Alangli inut rat asai keklem abangphu pinak ajoine MAC Horen Sing Bey pen chenglok kedamtang MAC kilik along karjap dun abangphu Phuding Terang lapen laprek kaprek ardi kedo klong abangphu-phi atum alangli phan kapadusi chepadi dun rinti. 

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives