ADVERTISEMENT

This area is available for advertisement. Please contact for details.

Arnivang
Get Adobe Flash player

Kangthilangso alamki along adai kave atum aphan kachenek ke human right aron karkan: ASDC

IMG-20180703-WA0036Diphu, Jakhong 3: Kedamtang Jakhong 8 arni bang hini arisomar atum aphan ajo porphai 8 apor malom phangkodong kitin pen apran karmut det alam ke kado kave ta chini lo. Laso aphuthak netum ASDC asong pen ningduk lo, seta non an ke havar along aprang ateng atemon kapajap thuji aphansi klem nang po pusi pini pherangke amai along ASDC atum pangdak.
Inut bang hini kechokche ajoine havar angkang kedo arat atum aphan an kapasung et ke chokche. Havar along kedo kadure det lapen adai kave atum non apor kisung-keboi pensi do nang lo. Adai kepdo atum aphan kiri-katarlip pu ajoine halahai adai kave arat atum kaphere ok klemhur, choki-chokam ahin lapen kaprek atum pen chekak dak asonsi do nang lo. Athe pini arni anta police atum pen halaso havar aphan inghap kling (sealed) asonsi do. Kangthilangso ahavar lapen kaprek-kaprek arong arat atum pachedam longle, pachevang longle asaisi police atum klem lo.
Kado kave ta chini pame Vosik pen Jakhong achiklo ke sai katiki apor binong, seta Kangthilangso ahavar kedo adai kave arat atum police keton pleng aphan kaphere ajoine sai anta chotiki longle det lo.
Osomar kenep atum do-oh pu alam pen ajok rong arat kaphere ajoine adai kave bang hini atum apran dam lo, lasi alam Karbi Anglong arlo chot kali bonta Assam angkang amatsi chethang lo lapen kado kave atum phere rinti lo.
Phangkodong kitin pen bang hini aphan apran karmut along kacherap kedo dun pu honthe pen non kado kave bang 45 sose atum aphan police atum nep ingnang lo.
Lapuson adai kave atum aphan kenep kanang pu ajoine rong arat atum kai ateng do-thak longle det lo lapen democratic adet along kedo atum ason juiphun dam phun long le det lo.
Lasi laso aphuthak Assam ratpangri matha pamesi havar along kai ateng atemon kevang thuji aphan klem nangji lapen Assam State Human Right Commission atum pen fact finding team nangtoisi human right aron ateng tarlip pen adai kave atum aphan kachenek pen pajok nangji pusi Autonomous State Demand Committee (ASDC) pen kachoningri alam pherangke amai pen ASDC dun meiphu Chomang Kro, sankur chunbang Jotson Bey atum pen pangdak. Pherangke amai along ASDC asongja Samuel Ronghang, Sonasing Terang, Nelson Teron lapen kaprek-kaprek man kedo atum chetongdun.

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives