ADVERTISEMENT

This area is available for advertisement. Please contact for details.

Arnivang
Get Adobe Flash player

Aronre pharmacy do-an pachinghap et nangji: AASU

IMG-20180703-WA0002Diphu, Jakhong 3: Drugs and Cosmetic Act 1940 and rules 1945 pachun serak nangji, Pharmacy Act 1948 under section 42 ateng medical store ateng pharmacist pado vek nangji pu alam jong dunsi AASU Diphu Regional Union atum pini Karbi Anglong a deputy commissioner arideng pinpur aloh pajir dam.
Karbi Anglong a district arlo atok ano along ta Drugs and Cosmetic Act 1940 and rules 1945 karkan lok asonsi thek long.
Pharmacy Act 1948 along kedo section 42 ateng pulote pharmacist kacharli tang abangphu dokok aphisi pharmacy kangpuji aphan amen chethap (registration) longji seta laso aronta arkan kraksi thek long athe Karbi Anglong arlo kedo phant 95% anbak a pharmacy along ke pharmancist ave pin pensi pini arni pharmacy ingpu bom lo. La-an chot kali alanglitum fake registration mate registration avepinsi pharmancy ingpu lo.
Aron ateng pulote pharmacy athengno along registration number heihui toksi tarpangthek tar vek nangji.
Lasi pharmacy kangpu ke monit a ok apran aphan isi kamatha nangji binong apotsi prapjin pen drugs inspector pen district arlo kedo aronre pharmacy atum aphuthak kapatarlip pen kechokche a pharmacy atum aphan sodak adai pa-en nangji puta AASU Diphu Regional Union atum pinpur aloh along jong dun.
La-an chot kali kechokche pharmacy an inghap damsi seal nangji pu anta jong dun. Lahai asai kapadeng serakji aphan ni thom angbong drugs inspector lapen arpu kedo asaikam atum aphan pinkhat nangji puta AASU atum jong dun. La-an chot kali pharmacy atum aphan kapithik pi aron prapjin pen pachun nangji puta AASU atum jong dun.
AASU ameiphu Shyamanta Gogoi pen chunbang Shorjun Hanse atum jalinsi pinpur aloh pajir dam.
Jongsi kejong ateng prapjin pen pachunche lapen AASU atum kachesong asai kedeng ahut kopene kasiksak dokok puseta AASU aphan akoi pi longle puta jong dun.
Pinpurme, Karbi Anglong district arlo kado kave hum 33 sose aronre mate registration kave a pharmacy do pusi birta long.

Leave a Reply

Your email address will not be published. Required fields are marked *

July 2018
M T W T F S S
« Jun    
 1
2345678
9101112131415
16171819202122
23242526272829
3031  
Archives