ADVERTISEMENT

This area is available for advertisement. Please contact for details.

Arnivang
Get Adobe Flash player

Tovar pen Dipluso adolong patang serak nangji pusi KSA atum kehang

IMG-20180702-WA0024Diphu, Jakhong 2: Atumi KSA Kajiranga District Committee atum patirpisi armu chejeng pen KAAC CEM Tuliram Ronghang aphan kapanong apinpur aloh Dalamara a OC arideng pinpur aloh pajir dam.
Pinpur aloh along Dolamara Forest Gate pen Dolamara hithi irui pen kecho ahithi an atovar kaselam kapatang serakji, Dipluso alangroi along kedon adolong kaselam patang serakji lapen rat atangka kapanahok lapen apor ateng sai kapatangte det Ghontu Pator aphan nep ingnang nangji pusi kehang alamthe jong dun.
Dolamara Forest Gate pen hithi irui pen kecho ahithi adak atovar kaselam nonputa kapatangte det ajok rat atum kacheleng katora anparta non barla arve kejang apor charli osomar atum arnivang kahelat kisung thetan khangjang lo.
La-an chot kali kedamtang penang aningkan aprang pen kaselam Dipluso adolong kapatangte det ajok Dadhora pen Dipluso ahavar arat atum ajirding klui pen tovar kachehelat kisung thektiksi dolo. Lasi tovar kaselam kapatang serakji anparta Dipluso adolong kapatang serakji aphan KSA pen CEM Tuliram Ronghang aphan kapanong a pinpur aloh along jong dun.
Pinpur aloh pajir damdet aphi KSA Kajiranga District Committee atum kangdang amai pangni. Mai along non malom kejap atemon aphuthak mai along chingvai. KSA Kajiranga District Committee ameiphu Santosh Rongpi kachepahemphu amai along chunbang Darsing Singnar mai kepha alamthe jai. Mai along alohi aman pen KSA tiri ameiphu Simeon Rongphar, HSDC chunbang Laichan Ingleng, dihin chunbang Khorsing Singnar atum pen chenglok GB, SGB atum chetong dun.
Kedamtang arni EM barim Raton Ingti keklem kepangkre lapen non kedo MAC Richard Tokbi ta kapangkre dunve ajoinesi non puta tovar lapen dolong tang thekthe det lo pusi mai along chethan.
Kaprek-kaprek ahavar along BJP parivartan ratpangri atum pen kachingthur asai klemsi kachelar do lo, seta Dolamara ahavar along nonputa kachelar theklongle det lo puta mai along kachetong dun alohi atum jai tekang pusi KSA ameiphu Semion Rongphar birta nangpale.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives