ADVERTISEMENT

This area is available for advertisement. Please contact for details.

Arnivang
Get Adobe Flash player

KAAC kaparlo saikam 30 asaiphu atum state pen centre atum kapinkhat ateng ot dun phit longle: KAAC

Diphu, Jakhong 2: Karbi Anglong Autonomous Council kaparlo saikam 30 asaiphu lapen saikhi atum Council aphan arju pameme pulote headqaurter oh longle pusi KAAC ajakong kedo atum pen aphong-aphong pachini lo.
Pinpurme, kedamtang 2007 aningkan, 2015 aningkan pen chenglok aphong-aphong lapusonsi KAAC ajakong kedo atum pen pachini bom lo.
Work Culture kapachihungji lapen Karbi Anglong Autonomous Council atum sai keklem kejoikeji aphan pu akemang pensi lapuson alamtoi pangdak lo. Laso aphita ajahak asaiphu atum patoite lapen pachini pameme pen headquarter ke-oh atum do lang.
Non KAAC kejalin bom CEM Tuliram Ronghang sai keklem ahin amethang amatta kisikpik ajoine ongdung saiphu atum amethang asaihem along kachedo mate ongdung apor Karbi Anglong arlo kedo pen sai keklem asonsi thek long.
Nonhet jong DO letter of hon’ble CEM vide No. KAAC CEM/2015-16.dtd 27/06/2018 ateng No. KAAC/GAD/Misc/2018/18 ateng pen isi akimi alam pachetak thu lo. Laso ateng saiphu-saikhi atum KAAC ajakong kedo atum aphan arju pameme pen state kalite tiri ratpangri atum kipi asai otphit longle. La-an chot kali mai kepha along ta chetong dunphit longle puta pachini.
Saiphu-saikhi atum jongsi state pen tiri ratpangri atum ketoi asai otji lapen kepha amai along chetong dunji pulote KAAC Chief Executive Member aphan arju tekang pame nangji pusi pangdak.
Karbi Anglong Autonomous Council along state lapen tiri ratpangri atum nang kachejok dun jam pen sai keklem katora kedo ajoinesi KAAC ajakong kedo atum pen lapuson alamtoi pangdak. Pinpurme, kedamtang arni penang an nang kachejok dun ajok sai keklem katora thek long. Laso ajoine ko-an ma KAAC pen sai keklem longji ke klem longle det asonsi thek long.
Lahai kado kave alam matha pensi KAAC kaparlo saikam 30 asaiphu-saikhi atum state pen tiri ratpangri atum kipi asai lapen kehang amai along kachetong dunphit phe detji aphan KAAC pen pachetak.

Leave a Reply

Your email address will not be published. Required fields are marked *

July 2018
M T W T F S S
« Jun    
 1
2345678
9101112131415
16171819202122
23242526272829
3031  
Archives