ADVERTISEMENT

This area is available for advertisement. Please contact for details.

Arnivang
Get Adobe Flash player

Pherangke Swarup Laskar aphan DPC kachepadi dun

IMG-20180701-WA0006DIPHU, Jakhong 1: Assam lapen ladak Karbi Anglong pen keklang ongdung birta aloh anparta electronic media along kacherap dun inut keklem kachepaduk lapen kangthimlim apherangke Swarup Laskar alangli pherangke ahamphang pen che-oh tang lo. Alangli jung-jung kopine asai kedokok ajok pherangke ahamphang pen kache-oh ke pherangke angbong inut kethek-kere lapen ardi kedo abangphu kachepangbo ason lo. Laskar asangho alangli pherangke ahamphang pen kache-oh pu ajok pini Karbi Anglong District Press Club pen alangliphan chepadi dun. Thekar arnivang birta aloh asaihem along District Press Club ameiphu Kiri Ronghang pen sankur chunbang Danielson Bey atum kechari kachepadi amai along ongdung pherangke klembang atum ta chetong dun. Laso ahut alangliphan District Press Club ameiphu Kiri Ronghang pen sankur chunbang Danielson Bey atum jalinsi ning kangsam asimbon poho, jarong pen aman pisi chepadi dunlo lapen alangli nahokle do-dam pusetame kaiketa a-ok apran mephun me-et pen hemtun isi kedo-kethak long pamekaji aphan anparta keklem-kedam asaitin along ta arnam kaparap dunji aphan ahirjume hangpi. Laso ahut pherangke Sarup Laskar amethang akai alamo chethansi alangli kechengsi pherangke achetai along kengkam kachejor dun pen non pherangke kache-oh an kiduk-kisung, ning karong, ning ke-oi do-an alam chiphurdet aphi pherangke klemrappet ahut kopine kechokche kelele do-anta diya po pusi alangli ning chethe.
Nagaon district Kampur alongsi pherangke Swarup Laskar amahang thek lo. Karlitang Aswini Kr. Laskar pen non pirthe achethe kedo bomlang Padmani Laskar atum asopo Swarup Laskar Kampur along amahang thek pusetame apo chokamar asai keklem ajok alangli West Karbi Anglong district Hamren arongsopi alongsi the ding lo. Haladaksi alangli loh charli dun lo lapen pherangke ahamphang alongke alangli 1997-98 aningkan pensi kilut duncheng lo. Laso aphi Diphu along nangdosi penang an state birta aloh Amar Asom, Aji, Natun Din, Ajir Doinik Batori, Asamiya Pratidin lapen electronic along abang ke News Time mate Pratidin Times along cherap dunlo. Lason thak thaksi Diphu pen keklang Sangbad, Dainik Batori, lapen non alangli Pahariya Khobor keklem bom ahutsi che-oh lo.

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives