ADVERTISEMENT

This area is available for advertisement. Please contact for details.

Arnivang
Get Adobe Flash player

Constituency pho apharman Dokmoka along Vikash Utsav kibi

IMG_2754Den Arong/Dokmoka, Jakhong 1: Dokmoka Higher Secondary School pathu aklam along Howraghat LAC kaparlo, Nomati, Hawraghat, Korkanthi, Mahamaya lapen Sochengdhenta, kado kave constituency pho apharman Vikash Utsav amaipi kapangni. Vikash Utsav amai pangchengche aprang KAAC CEM Tuliram Ronghang jalinsi Team Karbi Anglong atum Teke Rongpi pen Sarakani Dupor Timung lapen Katchirui Rongpi atovar ingpu dam. Laso aphi Longkam Teron akumlin akengri palesi aman pi pen mir hijung pen chingduk chardom tekang.
Anerlo porphai isi apor pen Dokmoka Higher Secondary School pathu aklam along Vikash Utsav amai pangni. KAAC secretary Nirola Phangchopi mai along alohi kapachini apor en lapen Babu Tisso mai kepha alamthe jai.
Mai along alohisarpo aman pen KAAC CEM Tuliram Ronghang chetong dun. Man-peng alohi aman pen 18 Hawraghat a MLA Joyram Ingleng, phapangjang alohi aman pen EM atum Raju Tisso, Khonsing Rongpi, Kache Rongpipi, Roton Teron lapen Tarendra Brahma, chopha alohi aman pen deputy chairman Ritish Inghi, MAC Lunsing Teron, Ramsing Timung, Horensing Bey lapen Dorsing Ronghang atum pen chenglok kaprek-kaprek man kedo atum chetong dun.
Pirthe adang Hindu atum kekroi arnam Ram amen ke inutvet seta Karbi Anglong arlo ke Ram bang hini do, Tuliram pen Joyram, latum ahirjume pen Karbi Anglong chingthur po pusi EM Khonsing Rongpi jai.
Congress ningkan 15 chari det pen KAAC angkang nahok ta tovar kemesen ave, kijun alang ave, keboidet atum aphan mesen IAY ahemso ave, nangle seta latum amat cho-et, mesen seh kachelang ahem ave, chokamar anghoi pipe pusi EM Raju Tisso jai.
Team Karbi Anglong kemesen ajok Mahamaya angkang amatsi ongdung tovar, me, lang mesen pen kelong rat thek pronglo pusi MAC Lunsing Teron jai.
Vikash Utsav atheke BJP ratpangri pen kopipi asonsi nangkele tang lapen non eprang kopipisi kachingthur ason nangkile jilang, lahai alam kachethan-kachingvaiji aphansi Vikash Utsav pini kibi. Lasi neli LAC angkang a EM, MAC atum aphan antame neli sorkar pen nang kapale do anta dipde pinsi pipachetangsi rat atum aphan paron thu po. Neli kedamtang loksi kado kave pangrumpet 58 an a scheme amokha deng lo. Laso along PMGSY pen chenglok poki adolong amokha pen KAAC angkang poki adolong kiding nei Deopani alangroi along 58 metre kidingta selam bom lo pusi MLA Joyram Ingleng jai.
Kedamtang ningkan 15 Congress ratchari atumsi chari lo, setame non ason team Karbi Anglong pu kave ajok tangka aphai chinine. Non ke KAAC pen chedonsar pen team Karbi Anglong pu amen pen thedung kachelar Karbi Anglong arlo thek long lo. Athema state pen tiri ratpangri pen KAAC along ko-an an atangkasi nangkele ma puke angton pen amatsi rat atum aphan than et lo. Laso ateng ningkan isivet angbongsi ongdung mesen kacheleng atovar open stage lapen lasonsi non kithurmi a ove charli kedo atum aphan anta mesen voreng avarsai kipiji aphansi nelitum thik bom lo. Bangso ahut apun-achak kechok atum ke aling pen seta avoreng ta longvek po pusi pini Vikash Utsav amaipi along CEM Tuliram Ronghang jai.
Hemprek ta hang bom nangji, kachingthur asai ta klembom nangji, SHG atum aphan kerap kipi pen chenglok tovar meh lang, chokamar kepek heihui asaita klem bom nangji. Hemprek nangjite angsong kangni atum pen chingki thek nangji lapen dak Dokmoka HSS pathu aklam along mesen thedung open stage penap pen nang pakim pipo puta CEM Tuliram Ronghang jai.
WWF Pronop Ch. Bora atum pen Dokmoka along kedo Western Range a ranger Rajen Rongpi arideng Bolero a gari akimi ihum pajir tekang. Kijutsi Dokmoka Range atum pen rat aphan thengpi aklim rong 15,000 mai along kachetong dun arat atum aphan ron dun. SHG atum aphan mai along amat vokak aso pen thengpi aklim ron dun lo.

Leave a Reply

Your email address will not be published. Required fields are marked *

July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives