ADVERTISEMENT

This area is available for advertisement. Please contact for details.

Arnivang
Get Adobe Flash player

Satlang ketok apor ahut rat amaipi kepha pang-ar chet abangsi kemeji

IMG-20180630-WA0017Sopen Terang, DIPHU: Kedamtang apor ahut Karbi Anglong arlo kedo hamphang asong lapen loh charli asong atum satlang ketok apor ahut loh charli a osomar atum aphan kasiksak dokokji pu ajoine rat maipi, mela heihui ta bi longle pusi pachethang bom lo. Lasonsi Assam Assembly Law Committee (AALC) penta loh charli osomar atum aphan katikuk dokok na pu ajoine mai lapen kachesong along charli a osomar atum dun longle lo pusi pangdak lo. Setame non malom longri angkangpi satlang ketok bom apor ahut rat amaipi ta bi bomsi thek long. Jongsi thek re-muchet asongja atum lahei aphuthak langchari pame-me pulote kevangji arni loh charli aosomar aphan katikuk kedoji angring do.
Pinpurme, Karbi Anglong alongri henlo Assam along pining aningkan HSLC pen HSSLC (Arts) asatlang angthek kelong dun kapaphi dun nai alongri lo. Halapu state ratpangni pen ta toklang kapachingthurji aphan pura akejoi pen toklang kapacharili (Free education) avarsai ta pilo, setame satlang apor ahut jongsi mai bi dun rong pulote satlang angthek me-o-eh detji angring anatsi dam bom lo.
Sonsi kedamtang Vosik niphai 28 arni West Karbi Anglong along kedo Kheroni along Mahila Samaroh amaipi along ta adunghet kedo Green English High School pen Kheroni High School along pusitame maipi kedo kok ajoine satlang ketok dun atum aphan akatora kedosi thek long. Bangso amaipi anarlo porphai 12 apor an satlang jutdet aphisi maipi pangcheng lo, setame bangso aprang pensi rat ahongjai alongke aseh kethe pen lam, lun paklang bom lo. Lasi lapuson pulote kopusonsi satlang angthek keme kethek dam longji pusi haladak arat atum pen ningje rinti.
Isi alongri along monsam lapen kachingthurji puke toklang kachingthur kenangsot lapen toklang pachingthurji pulote loh kachari kapangching abang kenangsot. Athe toklang henlo longri amahang kapaklarji araje lo. Kedamtang apor satlang abotor ahut longri angkangpi along mela, rong-aje, mai kibi longle detji aphan loh charli asong atum khamkhe dunsi pabi longle det asai deng dun bom lo. Athe satlang apor ahut lapuson maipi, rong-aje heihui bi pulote arta kijumhek loh charli osomar atum aning kaphirphar ta nangdokok ta thek. Lasi ratchari asong pen chenglok hamphang asong do-an atum toklang kapachingthurji aphan matha pangching pen jasemet satlang apor ahut maipi, mela, rong-aje kapang-ar mate khang dun abangsi kemeji puta penang an thek reset atum pen kaningje rinti.

Leave a Reply

Your email address will not be published. Required fields are marked *

BREAKING NEWS
July 2018
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives