ADVERTISEMENT

This area is available for advertisement. Please contact for details.

Arnivang
Get Adobe Flash player

Longkam Teron aphan kachikimo ningkan nerkep kepleng

IMG-20180629-WA0010Den Arong/Dokmoka, Vosik 29: Lammet kurupo Longkam Teron karli ningkan nerkep kepleng arni Dokmoka Longkam Teron auditorium hall along kachikimo. Pini lammet kurupo Longkam Teron alangli bangso apirthe che-oh det pen sining angsong arnam arni kepleng tang pining an ningkan nerkep kechok arni Dokmoka Longkam Teron Auditorium hall along Dongmukak KLA aro atum patirpisi kachikimo amai pangni. Sukursing Rongpi kachepahemphusi todap porphai 8 apor tirim kangduk asai klemsi sai angdeng pangcheng lo. Laso ahut Lammet Kuru Kt. Longkam Teron asopo akleng Arun Teron chetong dun. Mai along Probhat Teron pen Dhoniram Tisso anparta adon-arap atum ta chetong dun.
Todap porphai 10 apor Longkam Teron akai alammo lapen ason-son temoso, hirjir kihir amai ta pangni lo. Khoyasing Ingti kachepahemphu rat maipi along man-peng alohi aman pen KAAC EM Raju Tisso, EM barim Bidyasing Rongpi, Er. Badan Tisso, VDC chairman Longsing Tokbi, KLA bidisar Joysing Rongpi, BLCC chairman Saratsing Teron, chopha alohi aman Karbi Rong Asar Amei tiripi pen Rupen Hanse, DTC chairman barim Annanta Inghi, KUYA dun meiphu Longkiram Teron, Dokmuka LAMPS chunbang Rupsing Phangcho, Tekelangjun LAMPS chairman Amarjit Ingti lapen ongdung lammet-lamchong kachinghon arat atum ongdung chetong dun. Mai along penang an kachetong dun alohi atum pen lammet-lamchong kapangcho thekji aphuthak than pajir tekang. Kaprek-kaprek alohi atum pen Kt. Longkam Teron akai alamo than pajirmi tekang.
Mai along EM Raju Tisso kejai ke, Khasia, Mizo akhei atum kopi apotsi amethang alam kaprek akhei atum aphanta paningje etlo? Lake alam kachinghon ajok lo. Hako pen Karbi akhei aphan alam alun jutang-jubat lapen aron-atang lun-temo kachinghon thektik atum, pinpurme Ru Semson Sing Ingti, Khorsing Terang, Joysing Doloi, Rolen Ingti, Bonglong Terang, Samsing Hanse, Bronson Ingti, Longki Tokbi lapen Padmashree Prof. Rongbong Terang alanglitum henlo. Lasi alanglitum ason thotsi non Karbi Anglong kedo a Karbi akhei atum anta matha dun thipsi aphi padun kriji aphan bor- i vek nangji, setame pini ilitum kachethek longke pei aphanta maa, apo aphanta baba pu kehangsi than rong lo. Laso ateng matha dam lote khei kivir angthek lo pusi EM Raju Tisso jai tekang.
Kijutsi Joysing Taro (Nigru) kejai ke, ne kereng un ahut ke nangtum aphansi ale lo setame ne thilot aphike nephansi alelo, sonsi pini Ru Longkam Teron ta lason lo pu alamthe ensi kado kave aphan kachoro pajirsi mai pachekak lo.

Leave a Reply

Your email address will not be published. Required fields are marked *

BREAKING NEWS
June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives