ADVERTISEMENT

This area is available for advertisement. Please contact for details.

Arnivang
Get Adobe Flash player

CAB che-en-eh pulote BJP atum Assam pen che-oh nangpo pusi 29 Hamphang asong atum sodak kether

Khei kapavirji aphan kedeng CAB aphuthak khamkhesi Guwahati along chingrum pet kachesong

CABGUWAHATI, Vosik 29: Citizenship Amendment Bill aphuthak khamkhesi pini state adangpi kaprek-kaprek adim pen suri suri armu chetong dunsi Guwahati Latasil pathu aklam along kachesong sining longle paklem hur anlo.
Labangso a Bill jongsi che-en-eh pulote peh-ri chitilupsi BJP atum Assam pen che-oh nangpo pusi kachesong arat atum sodak kether. Hindu Bangladeshi keraikomji aphan akemang pen BJP tiri ratpangri atum kapangdak Citizenship Amendment Bill 2016 lake mentuneta deng thekthe laso ajoinesi pini Assam arat thurpak hong nangbarlo pusi alanglitum ningje.
Suri-suri bill aphuthak kekhamke arat atum kacheto anglum along AASU bidisar Samujjal Bhattachrjee kejaike, kedamtang Assembly kilik ahut BJP jabang atum kachechak alamthe chepapleng non lapen khei barim atum akemang ason papleng non. Kilik apor ahut vote hangsi BJP jabang atum khei barim achatai tin along damsi vote chohang dam lo. Non laso khei barim atum methang jutang-jubat elam eki kacheraikomji aphan mate Citizenship Amendment Bill che-en nangji pusi pini hong nangbar lo. Rat atum hong nangkebar ahutle laso akisung kapajokji aphan keklem chepaklang noi. Non hong nangkebar ahut jongsi lahai akisung pajokje pulote kachesong arat atum mo rachari jabang atum ahem achetai along kachesong dam ahut abangke dolong joije lo.
Pini Assam adangpi pen Latasil pathu aklam along suri suri armu kacheto Satyagraha amaipi along Bhattcharjee kaningje thuke, pini rat atum akemang kachesong pensi ratpangri atumta kacharli dun kenangsotlo puta thersi NRC pen Citizenship Amendment Bill la hini asonta kaprek-kaprek setame ratpangri atum hini asonta isivet kapinchongji aphansi bor-i lo. Hini asonta isivet kapinchongche detji aphan state ratpangri aphan thersi CAB aphuthak non amatke rat atum methang ning kehang alam Joint Preliminary Committee atum along chepaklang dun tanglo lapen labangso a Bill aphuthak ko-ansi kekhamkhe ma aphuthak ta pini Latasil pathu aklam along rat atum ajakong chepaklang tanglo lasi tiri central govt. investigation team atum Assam arat ajakong nanglang tame pusi jai.
Ratpangri atum nonhetjong Assam arat aphan matha nangne pusi ningjelo setame rat atum ning kachethethip ason ratpangri atum thangnat asai kedeng avelang laso ajoinesi rat atum ning kachethe athai kave det ajoinesi rat atum hong an nangbar nangkoklo puta Samujjal ningje. Halapu nonhetjong kapangdak Census alongta Assamese alam-eki lapen jutang jubat aphan kaphere meme angthek nangdo tanglo laso aphita ratpangri atum kanghong bom abangke alam amatsi avelo lasi prapjin pen labangso a bill ingthan serak nangpo pusi Samujjal Bhattacharjee hang.
Ratpangri atum kether-kehap ajutang keklemkle detji aphanta Samujjal thersi ladak nangkether-nangkehap ajat ta chepaplengple pusi ther.
Pini Gana Satyagraha Latasil pathu aklam pen Chandmari Engineering pathu aklam an armu chejeng. AASU sankur chunbang Dipangka Kumar Das kapatirpi kachesong armung along Assam adangpi Karbi, Dimasa, Bodo, Hajong, Mech, Kachari, Tiwa, Sonowal Kachari pen danglok pangrum pet 29 hamphang asong jabang, klembang atum pen danglok suri suri arat atum cheto dun lo. Ratpangri atum Assamese akhei aphan amoi arbung pabopsi arurang kapinchongji aphansi bidi langno keklem pu AASU sankur chunbang Lorinjyoty Gogoi akoi pisi laso abidi langno ilitum alar huivek nangpo pusi ningje.
Alangli kaningje thuke khei longri keraikomji apharman alam kaningje pen Dispur anghoi kangni Chief Minister Sarbananda Sonowal ahin pen labangso a bill kekhangkheji aphan jakong cheharjak nangpo. Tiri ratpangri atum nangkepakan aling sai keklem dun abangke chokche. Teke ase ason chepathesi laso a bill aphuthak kekhamkheji aphan sai deng nangpo. Kilik aprang Bangladeshi atum peh-ri chitilupsi dam nangpo pu lapen Bangladeshi aphan chimun isita longle pek un-eh pu BJP atum ningjelo setame rapangri sengdet aphi kachechak alamthe chepaplengple det abangke chokche. Rat atum aning kehang mate kemang ason pachunche pulote kaphere meme asai chetong nangpo lapen Jongsi laso a Bill dengdet pulote peh-ri chitilupsi BJP atum Assam pen dam nangpo pusi ther. Lasonsi pini CAB aphuthak kekhamkhe along kacheto dun hamphang asong jabang atum pen danglok kaprek kaprek asong jabang atum laso a bill che-en vek nangji pusi hang.
Pini Gana Satyagraha kachesong alongklam along Karbi Anglong pen loh kacharli ongdung asong atumta chetong dun.

Leave a Reply

Your email address will not be published. Required fields are marked *

BREAKING NEWS
June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives