ADVERTISEMENT

This area is available for advertisement. Please contact for details.

Arnivang
Get Adobe Flash player

NEC ke Hamren rongsopi aphan choki chokam amo kapaboi asonsi man lo

necHAMREN, Vosik 28: Assam state kapangdak district kimi West Karbi Anglong ahempi Hamren angkang kachingthur kethek longji kali kacheleng atovar anta mesen ave. North Eastern Council (NEC) pen Hamren angkang long thom adim dolong kaselam nonputa kapatangte det ajok gari-motor kacheleng penang an ajir kiding kisung chechak nang lo. Hamren hithi kimi alongsi bus kapasang adim kedo-et ajok hithi barim pen hithi kimi anke dam nangkok. Seta Hamren hithi barim pen hithi kimi an kapaleji aphan ke Ward No. 4 Rongjangphong arong lutpon nangji. Bangso atovar ta non malom ke tovarpi kapinchong thudet ajok inghan atovarsi man det lo.
Rongjangphong angden gari kethe akele kachehalat thupik ajok nonke inghan karnuk gari akongtelong konglong un-e pin lo. Anparta tovar ajam kibihek ajok ihumbak kachingthang lote a ghonta-ghontasi kachonghong nangta dolo. Non ateng pulote Hamren hithi barim along ansi gari kethe ke vang un chot po.
Kamanghumeme alam abang ke lapu-an dolong kethom ave det, tovarpi chehalat longle det anta NEC atum dolong kaselam adim along sub-way alon dojot kaselamji aphanta matha thelang asonsi thek long. Lapu-an ajir kiding tovar kachehalat move rat kisung thek long prong anta Karbi Anglong arleng kethe jasemetpet MLA Dr. Mansing Rongpi pini arni anta laso aphuthak kaningje arju longle lang. La-an chot kali CEM, EM atum anta laso atovar nang lang pliple pusi rat atum ningje.
Pinpurme, minister Dr. Himanta Biswa Sharma Hamren kevang ahut kaningje, BJP hai lote cheklo jon thom angbong mesen atovar selam po puke kemeji kalisi atovar anta chehelat thu longle det khangjang lo. Tovar, dolong kavedet ajok auto kachopon ajak kiding kedam nang pen sika 20 adim sika 30 pen 50 an auto kachethap anam en lo. School loh kacharli osomar atum dolong kave pen tovar kachekap un-e ta kachiru-charnap pho nang lo. Tovar kahenopik ajok keton-kelang atum aphanta anta kasiksak thedungsi thek long athe raikom asaikhi atum kaprek-kaprek adim kahumri damji lapen kelangchari damji aphan ta akisung akatora thedung thek long.
NEC tovar kaselam kapatangte lapen dolong kaselam kapatangte det ajok West Karbi Anglong ahempi aphan kachingthur aphan kapabop asonsi nangman tang lo.
Ratpangri jabang alamchak kipi lapen kachechak lamthu lamdok “parivartan ” pu rat angno kejai ke rat aphan kachongthui chot asonsi thek long. Kedamtang 2011 aningkan pen kaselam pining an ningkan troksi pleng etlo seta tovar ketangji aphan aharchi anta nonputa thek longle lang puta Hamren rongsopi arat ningje.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives