ADVERTISEMENT

This area is available for advertisement. Please contact for details.

Arnivang
Get Adobe Flash player

Kitinthap kahonthe thap aphuthak kachesong arjap thip ansi lahai asai langno pavir unji: CM Sonowal

Kheroni  along Mohila Samaroh amaipi kangni, hemprek alam CEM Ronghang aphongtin ningje dun seta ardi pipe

IMG-20180628-WA0047DIPHU/GUWAHATI, Vosik 28: Kitinthap lapen kahonthe thap asai langno aphan kado kave atum ta arjap rappet pen chesong ansi ilitum ahamphang pen lahai asai langno pavir unji pusi pini Kheroni along Mohila Samaroh amaipi kangni ahut Chief Minister Sarbananda Sonowal ningje. Alangli kaningje thuke hako lahai kitithap lapen kahonthe thap dim aklong ave laso along jasemet pet so-arlo atum arpu thenai lo. So-arlo atum methang asomar atum aphan kemesen atovar keja ponji aphan jakong pidun nang po lapen kithurmi atum aphan science technology ahin kapaprangji ponji aphan so-arlo atum sai kedeng paprang nang po. Kheroni High School pathu aklam along kangni Mohila Samaroh amaipi along alohi sarpo aman pen chetong dunsi Chief Minister Sonowal kaningje thuke Karbi Anglong, West Karbi Anglong pen Dima Haso kethom inglong a district along kedo kijui kelang meme adim heihui pachingthursi angtan pen kijui kelang aphan kevang arat atum aphan aning kangpangsam lapen aman-apeng pi nang po. Laso a district abolon akaprek adet atum pen jum dunde. Laso ajoine laso a district kacharli, seh kelang, industries, social welfare, Agriculture kado kave ahin kangthur ponji aphan state ratpangri cheparideng lo pusi ningje. Alangli kaningje thuke pachingthur ponrappetji aphan state ratpangri atum ason-ason a scheme deng lo. Sai katiki atum aphan kapachingthurji aphan Irrigation a project kedeng pangcheng lo anparta kevangji chiklo jon ni jon thom angbong hin-hin kapacheleng avarsai kapangtangji aphan la kethom inglong a district arlo kedo-an tovar akrong pachingthur po. Elam pen kali asai keklem pensi paklangji pusi ningje. Alangli kaningje thuke Subhagya scheme pen 26 lakh ahemtun atum aphan me rihing avarsai pilo lapen 52 lakh ahemtun atum aphan ningkan isi along LED a bulb pumpli kipji aphan scheme deng lo puta ningjesi kedamtang aratpangri atum inglong a district arat atum aphan pai pateng asonsi langlo setame non kachari aratrpangri atum ke kethom inglong a district monsam lapen kachingthur ahin penang an paprang ponlo pusi ningje. Alangli kaningje thuke monsam ave pulote chingthur un-eh, lasi monsam kapathir kenangsot puta ningjesi Umrangso along kikim-kerangji Assam Civil Service Training Centre ke detpi angbong kachingthur nai training centre cheman po pusi ningje.
Mai along alohi aman pen kachetong dun education, health, PWD lapen finance minister Dr. Himanta Biswa Sarma kaningje ke, kilik ahut Karbi Anglong kapachingthurji aphan kachechak alamthe kapaplengji aphan non kachari aratpangri atum klempo. KAAC kaparlo 26 constituency alongtin constituency aphan sika 10 crore atangka pajir po. Kevangji Pre hini arni pen arta ningkan 60 athak sarhu-sarhang atum aphan pension pipo puta minister Sarma ningjesi Karbi Anglong pen Dima Hasao arlo kacheleng atovar heihui kapachingthurji aphan state ratpangri ahin pen sika 100 crore atangka pajirji pusi mai along lamchak chipi. Diphu pen Haflong along cancer hospital kimpo lapen Hamren pen Bokajan alongtin along 200 bedded seh kelang ahem kimpo pusi ningje.
Halapu CEM Tuliram Ronghang kejaike Sarbananda Sonowal chief minister deng det aphi Sab ka Sath Sab ka Viskash pu kemang ateng ke phurkimo along kechengsi aphong Self Help Group (SHG) atum aphan cheque keron pen methang jongjung ale mate kereng e-unji aphan varsai pi long lo. Sonsi Karbi Anglong, West Karbi Anglong pen Dima Hasao la longri kethom aphan ansose kapachingthurji aphan pura special package asai kechengsi aphong nangpi lo. Special Package amen pen Karbi Anglong aphan sika 260 Crore atangka lapen halapu Dima Hasao aphan sika 100 crore atangka Assam ratpangri pen nangpi po. Lasi, Karbi Anglong pen Dima hasao arat aphan special package Assam ratpangri pen kipi ponverji aphan KAAC CEM Tuliram Ronghang mai along lamthe paklang dun. Team Karbi Anglong pen Dima Hasao ahin pen longri angkang isivet kachingthurji aphan 24×7 sai klem ponji. Lasi rat atum kaike kacherap dun kenangsot. Karbi Anglong pen Dima Hasao arat arjiding klui pen kemang Article 244 (A) pusitame non Chief Minister Sarbananda Sanowal lapen Finance Minister Himanta Biswa Sharma atum Assam ratpangri kacharibom ahutsi pachun po pusi ning kethe do puta mai along KAAC CEM Tuliram Ronghang pen mai kepha alamthe along jai.
Pini labangso Mohila Somaroh amaipi along Diphu Parliamentary Constituency kaparlo 12 SHG atum aphan Kanaklata Mahila Savalikaran scheme pen achomtin SHG atum aphan sika 25,000 atangka cheque pajir. Laso a scheme pen Diphu Parliament Constituency pangrumpet chom 5037 SHG atum aphan sika 25,000 atangka pajir po. Mai along HAD minister Sum Ronghang, minister Naba Kumar Doley, Assam Assembly chairman barim Ranjit Das, DHAC CEM Debolal Garlosa, MLA atum Dr. Mansing Rongpi, Dr. Numol Momin, Joyram Ingleng lapen KAAC pen DHAC EM atum pen danglok MAC atum chetong dun. 
Pinpurme alongtin thedung-thedung mai-thai along mate Assam pen nangkisung ratchari jabang atum kachetong dun amaipi along CEM Tuliram Ronghang Karbi khei longri apharman hemprek alam abangke ningje dunverlo setame ningduk meme alam abangke ratchari jabang atum karjupi abang ave det titi. Chok-chokche pusetame thangta ningje tekangke. Lasi ladak pen langdam pulote district along inut jabang aphan alam ardi kipipe ason mandet lo.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives