ADVERTISEMENT

This area is available for advertisement. Please contact for details.

Arnivang
Get Adobe Flash player

Sika 350 crore atangka kachingthur asai dengsi ingdeng 67 KAAC mahang kethek arni katalon

Kethom inglong alongri kapachingthurji aphan Assam ratpangri kaiketa chisik dinglo: CM Sonowal

sarbanandaDIPHU, Vosik 23: Kedamtang 1952 aningkan Karbi Anglong District Council mate non Karbi Anglong Autonomous Council (KAAC) sengdet aphi piningkan an arta ningkan 67 pleng tanglo. Pini arni ason lake Karbi Anglong mate Karbi arat aphan thedung phurkimo ning karong arnilo. Pini sika 350 crore atangka kachingthur asai dengsi ingdeng 67 KAAC mahang kethek arni alir alon pen talon. KAAC Deputy chairman Ritesh Inghi kachepahemphu rat amaipi along Assam Chief Minister Sarbananda Sonowal alohi sarpo aman pen chetong dunsi Karbi Anglong, West Karbi Anglong lapen Dima Hasao la kethom inglong a district kapachingthurji aphan Assam ratpangri atumke kaiketa chisik dinglo pusi ningje. Alangli kaningje thuke Karbi Anglong arat aphan keklem-kedam pitekang atum aphan chikimo vek nangji puta ningjesi India Prime Minister Narendra Modi sabka Sath Sabka Vikas pu akemang atengsi detpi arlo kado-kave aphanta kelang kapachingbar lapen pachingthur ponrap petlo. Karbi Anglong kapachingthurji aphan Central  pen pen state penta ongdung atangka palelo. Joysing Doloy Audotorium hall along katalon bangso KAAC mahang kethek arni amai along Chief Minister Sarbananda Sonowal kaningje thuke kijui kelang ahin Karbi Anglong lapen West Karbi Anglong district penang an ason do lasi Diphu arongsopi pen Haflong arongsopi aphanta Darjeling, Deradun lapen Shillong alongri atum asons thotsi kijui kelang adim kapinchong thekji aphan state pen KAAC cherapsi sai dengbomlo pusi ningje. La anchot ta kali Karbi Anglong longle, lang temon mepik lasi katiki ahin chepaduk ra choki chokam ahin kapachingthur dunthekji aphan said eng nangpo pusi ningje. Kahonthe thap mate kitinthap lahai asai langno pen kachepaheloji aphan anutinta arjap nangpo lapen cheroktok nangpo. Nonhetjong Dokmoka Kangthilangso along alamki adai kave inut aphanta pasungse laso along sankur arat atum matha chepasung nangne setame adai kedodek atumke phopo  puta Chief Minister Sonowal ningjesi Assam Sahitya Sabha meiphu barim Padmashree Rongbong Terang  ahin pen ning isivet kedoji aphan kekhang dunthek aphuthak kachoro pajir. Halapu Apran kedamjui karlitang Nilotpol Das pen Abhijit Nath atum aphan hadak KAAC ahin pen kumlin parjap piji pu CEM Tuliram Ronghang pen kapangdak lake ning isivek kedo angthek paklanglo pusi ningje. HAD Minister Sum Ronghang, MP Birensing Ingti, MLA Dr. Numol Momin, Joyram Ingleng pen danglok ongdung EM, MAC lapen police asaiphu atum kachetong dun amai along Chief Minister Sarbananda Sonowal kejai thuke, KAAC CEM Tuliram Ronghang kejalin pen Karbi Anglong constituency tin arlo along kado kave atum aphanta pangrom ponsi kachingthur ahin kengkam chejor lo lasi laso along Assam ratpangri cherap cheto dunji puta ningjesi Central pen state ratpangri atum Karbi Anglong apharman kapachingthurji aphan penang an a scheme deng lo. lason thak thaksi Constituency kaparlo kapachingthurji aphan state govt. pen sika 100 crore atangka special package budget along deng pon lo. Kaprek-kaprek kachingthur a scheme pen danglok Diphu along medical college kikim, Diphu along Law College kikimji aphan kacherai lapen Diphu pen danglok KAAC kaparlo constituency tin along sport project aphan state govt ratpangri atum denglo pusi ningje. Kevangji Pre achiklo niphai 2 arni pen sarhu-sarhang atum aphan chiklo jonvang pension kipi asai dengp puta ningjesi State ratpangri ahin pen kapachingthurji aphan kedeng scheme heihui aphuthak ningje.
Kachingthur asai kedeng pensi pining ingdeng 67 KAAC mahang kethek arni talon lo lake isi phurkimo lo pusi KAAC CEM Tuliram Ronghang ningje.  Kapachingthurji aphan ghonta 24 angbong pen ghonta 18 sai keklemji aphan bor-iji puta CEM Ronghang ningjesi Assam ratpangri ahin pen Karbi Anglong kapachingthurji aphan penang an akerap nangpajirlo lake Chief Minister aphan chorovek nangji pusi ningje. Karbi Anglong mesen kacheleng atovar kaselamji aphan State ratpangri atum ningkan kethom angbong sika 500 crore atangka nangpipo. Halapu kapathu ahinta ardi pisi state ratpangri special package pen sika 260 core atangka nangpipo. Laso 260 crore atangka pensi Constituency tin along siak 10 crore atangka thak rep po. Diphu arongsopi kapachingthur mate abolon kapadoji aphan state govt pen sika 100 crore atangka nangpajir lo puta ningjesi Diphu along Multi Storey car parking, Shoping complex pen danglok ongdung kachingthur asai klempo. Central scheme pen pen kedamtang ningkan hini angbong state ratpangri atum ongdung atangka nangpilo setame kedamtang aratrpangri ahut lapu-an longle lang puta CEM ningjesi sai keklem ajutang kirimji aphansi choningri. Mai along KAAC lokimo, Sekhar Ingti ketok Sixth Schedule akitap, Lunse Timung ketok Karbi Community Law akitap Chief Minister Sarbabananda Sonowal arideng pensi ingpu. 
Ingdeng 67 KAAC mahang kethek arni pacheton dunsi kapathu kethek ahin, sai katiki kachepaduk ahin pen danglok loh kecharli ahin kethek kere atum aphanta archosi nong-eh pajir. Pini KAAC ahin pen bang 24 ASHA klembangphi atum aphanta cycle alar Scotty si pajir lo.  Adap apor Ru Semson Sing Ingti, Khorsing Terang a park arlo melur lapen mir alek veksi chikimo lapen KAAC deputy chairman Ritesh Inghi arideng pen detpi alama ingthursi Diphu hithi arlo thepi aklim ke-eh anparta Diphu Civil Hospital along  keso abangphu bangphi atum aphan thesere ron dam.   Arnikangsam apor Art & Culture asaikam patirpisi lun kan amalin bi.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives